அலுத்துப் போகுதல்

விடுபடல்

இறைவனிடம் கையேந்தி

இல்லையென்று சொல்லாமலா

அமர்ந்திருக்கிறார்கள்

கோயில் முன் பிச்சைக்காரர்கள்

திக்கற்றவர்களுக்குத்

தெய்வமும் துணையில்லாமல் போகாமலா

வசித்துக் கொண்டிருக்கிறார்கள்

ப்ளாட்பாரவாசிகள்

நம்பியும் கைவிடப்படமலா

ஒட்டுமொத்த உடலையோ

உடல் உறுப்புகளில் ஒன்றையோ

விற்றுக் கொண்டிருக்கிறார்கள்

வீதியிலும் ஆஸ்பத்திரியிலும்

தட்டியும் திறக்கப்படாமலா

கேட்டும் கொடுக்கப்படாமலா

அலைந்து கொண்டிருக்கிறார்கள்

ஆயிரமாயிரம் அகதிகள்

*****

அலுத்துப் போகுதல்

ஏகப்பட்ட படங்களை டௌன்லோட்

பண்ணி வெச்சிருக்கேன்

பார்க்கத்தான் முடியல

என அலுத்துக் கொள்கிறார்

வெப் சீரிஸ்க்கு அப்டேட் ஆகி விட்ட

பக்கத்து வீட்டுக்காரர்

வாட்ஸாப்பே வரதில்லையே

ரொம்ப பிஸியோ என்ற கேள்விக்கு

இன்ஸ்டாவில் ரொம்ப பிஸி என்று

மறுசெய்தி போடுகிறார்

பார்வேர்டு பரமசிவம் எனப் பெயரெடுத்த

அலுவலக சகா

என்னமோடா சீரியலே பார்க்கிற

இஷ்டமே போயிடுச்சு என சலித்துக் கொள்கிறார்

யூடியூப் பிரியை ஆகி விட்ட எதிர்வீட்டு அத்தை

ப்ளேஸ்டேஸனை விட்டு விட்டான்னு

சந்தோசப்பட முடியல

மொபைல்ல எந்நேரமும் விளையாடிட்டுக் கிடக்கிறான் என

சலித்துக் கொள்கிறார் சந்தோஷ் சித்தப்பா

அமேசானிலும் பிளிப்கார்டிலும் பார்த்து முடித்துக் கொள்கிறார்

நேரில் பார்த்து வாங்குகிற மாதிரி வருமா என

கதையளந்த கருத்து கந்தசாமி மாமா

இன்னும் என்னென்ன வந்து அலுத்துப் போகுமோ என

எதிர்காலத்தில் வரப் போவதை நினைத்து

இப்போதே அலுத்துக் கொள்கிறார்

பெட்ரோல் ஸ்கூட்டரிலிருந்து எலெக்ட்ரிக் ஸ்கூட்டருக்கு

மாறி விட்ட மிலிட்டரி தாத்தா

*****