சைபர் வீதி வாழ்க்கை

சைபர் வீதி வாழ்க்கை

RIP யும் ஸ்மைலியையும்

தட்டி விட்டு கடக்கின்றன துக்கங்கள்

காப்பி பேஸ்டில் லட்சம் கோடியாகத்

தயார் நிலையில் இருக்கின்றன வாழ்த்துகள்

அடடே என அசத்த நினைவகத்தில் தேங்கிக் கிடக்கின்றன

எப்போதோ எவரெவரோ அனுப்பிய பகிர்வுகள்

ஏகப்பட்ட படங்களை டௌன்லோட் செய்து

எதையும் பார்க்க முடியாமல் ஓடுகின்றன நேரங்கள்

எப்போ பார்த்தாலும் சீரியல்தானா என

அம்மாவிடம் அலுத்துக் கொண்டு

வெப் சீரிஸ்களில் மூழ்குகின்றன அறிவுரைகள்

வாட்ஸாப் வராமல் போவதற்கு

இன்ஸ்டாவில் பிஸியாக இருக்கின்றன காரணங்கள்

விஷேசங்கள் வந்து விட்டால்

பேஸ்புக்கிலும் டிவிட்டரிலும் வாழ்த்து சொல்ல

எப்போதும் தயாராக இருக்கின்றன 4K இதயங்கள்

மெய் நிகர் சைபர் வீதியில் எந்தக் குறையும் இல்லாமல்

ஒட்டும் உறவும் இல்லாமல் நிஜமாகச் சைபர் வீதியில்

ஓடிக் கொண்டிருக்கிறது வாழ்க்கை

*****

பாதியில் முடிந்து விடும் கடைசி

கடைசி தருணத்தில் சொட்டும்

அற்புத தருணங்களை ருசிப்பதற்குள்

மண்டையைப் போட்டு விடுகிறது வாழ்க்கை

மரத்தை வைத்தவர் கனியைப் புசிப்பதற்குள்

மரணித்து விடுவதைப் போல

இதுவரை எழுதப்பட்ட அத்தியாயங்களினின்று

அங்கொன்றும் இங்கொன்றுமாக

பிடுங்கிப் போட்டபடி

சாதனை விளக்கக் கூட்டத்தைப் போல

தொகுக்க வேண்டியிருக்கிறது

கடைசி அத்தியாயத்தை

பாதியில் நின்று விட்ட வண்டியை

வீடு வரை இழுத்து வராமல்

நிறைவடைந்து விடுமோ பயணம்

*****