விளம்பரமற்ற வெளிச்சம்

விளம்பரமற்ற வெளிச்சம்

மின்சாரம் வந்த பிறகும்

விளக்குகள் ஏற்றி வைக்கப்படுகின்றன

ஏற்றிய தீபங்கள் அணையாமல் இருப்பதற்கேற்ப

மின்விசிறிகள் நிறுத்தி வைக்கப்படுகின்றன

விளக்கின் வெளிச்சம் தேவையற்றது போல

அனைத்து மின் விளக்குகளும் பிரகாசமாகின்றன

திடீரென மின்சாரம் தடைபடும் நேரத்தில்

விளக்குக்கான பிரபல்யம் வந்திருக்கக் கூடும்

அதற்கும் வாய்ப்பின்றி

ஒட்டுமொத்த வீடும் மின்தடையற்ற

மின் சேமிப்புக் கலங்களில் இயங்கிக் கொண்டிருக்கிறது

என்றாலும் ஏன் எரிந்து கொண்டிருக்கிறோம்

என்ற எரிச்சல் ஏதும் இல்லாது

எரிந்து கொண்டிருக்கிறது திரி

வெளிச்சத்திற்கு ஓர் விளம்பரம் இல்லாமல்

ஒளி வீசிக் கொண்டிருக்கிறது விளக்கு

*****