பூனைக்காகக் காத்திருத்தல்

பூனைக்காகக் காத்திருத்தல்

ஒரு பூனையை விட

நாய் பிடித்தமானதாக இருக்கிறது

எட்டி உதைத்தாலும்

காலடியில் வந்து படுத்துக் கொள்கிறது

பூனைகளின் அகம்பாவம்

ஒரு சிறு புறக்கணிப்பையும்

பொறுத்துக் கொள்ள முடியாமல்

விலகி ஓடச் செய்து விடுகிறது

இரவின் சிநேகம் அதிகம் கொண்டு பூனைகள்

பகலின் சிநேகம் கொண்டு நாய்களை

மனிதர்களுக்குக் கோர்த்து விட்டு விலகிக் கொள்கின்றன

அன்றொரு நாள் உணர்வு வேகத்தில் திட்டியதற்குப் பின்

காணாமல் போய் விட்ட பூனையைப் பற்றி

புலம்பிக் கொண்டிருக்கிறாள் அம்மா

அத்தனை நாய்கள் நிறைந்த வீட்டில்

அம்மாவின் சிநேகிதியாய் இருந்த பூனை

இப்போது எந்த வீட்டின் ராஜபாட்டையில்

பயணித்துக் கொண்டிருக்கிறதோ

என்றோ ஒரு நாள் வீடு தேடி வரும் என்ற

நம்பிக்கையோடு அம்மாவும் காத்துக் கொண்டிருக்கிறாள்

அம்மாவுக்குத் தெரியாமல் நானும் காத்துக் கொண்டிருக்கிறேன்

போனால் போகட்டு விடு என்று அடிக்கடி சொல்லியபடி

*****