அது அப்படியும் இருக்கலாம்

அது அப்படியும் இருக்கலாம்

என்னிடமிருந்து எப்படியோ நீயும்

உன்னிடமிருந்து எப்படியோ நானும்

தப்பித்துக் கொண்டோம்

நான் அதிகம் நேசித்தது உன்னைத்தான் என்பதை

எப்படி என்னால் சொல்ல முடியாமல் போனதோ

நீ அதிகம் நேசித்தது என்னையா என்பதை

உன்னிடமிருந்து எப்படிக் கேட்டுத் தெரிந்து கொள்ள முடியாமல் போனதோ

நீ வேறொருவரைக் காதலித்ததிலிருந்து

அப்படிக் கூட இருக்கலாம்

நான் காதலைச் சொல்லாததும் காரணமாக இருக்கலாம்

இப்போது உன்னைப் பேரன்போடு பார்க்க விழைகின்றன கண்கள்

சுருளும் போது உன்னையே நினைத்துக் கொள்கிறது மனம்

யாருக்கும் தெரியாமல் எப்போதும் நீ

என்னுடன் இருக்கிறாய்

நினைக்கும் போதெல்லாம்

உன் அருகாமைக்குப் போய் விட முடிகிறது

எப்படி எப்போதும் இப்படி உற்சாகமாய்

இருக்க முடிகிறது என்று

நீயே ஒரு நாள் கேட்டு விட்டுப் போனாய்

உற்சாகமாய் உன்னை உள்ளுக்குள் வைத்திருப்பதை

உன்னிடமே எப்படிச் சொல்வதென்று விட்டு விட்டேன்

பிறிதொரு நாள்

உங்கள் உற்சாகத்தைக் கொஞ்சம் தர முடியுமா என்றாய்

உன்னையே உனக்கெப்படி தர முடியும் என்ற

புரியாமைப் போதாமையால் முடியாது என்றேன்

நான் வைத்துக் கொண்டு

வஞ்சகம் செய்திருப்பதாய் நீ நினைத்திருக்கலாம்

உன்னை எனக்குள் வைத்திருப்பதால்

அது அப்படியும் இருக்கலாம்

*****