பரிகாசச் சிரிப்பு

பரிகாசச் சிரிப்பு

நிறைய சொத்து பத்து சம்பத்துகள்

அவை என்னைப் பார்த்துக் கொண்டனவா

நான் அவற்றைப் பார்த்துக் கொண்டேனா

என்பது முக்கியமாகாது

நான் அவற்றைப் பார்த்துக் கொண்டதும்

அவை என்னைப் பார்த்துக் கொண்டதும்

மாறி மாறி நிகழ்ந்து கொண்டிருந்தன

உறவுகள் வந்தார்கள் போனார்கள்

நண்பர்கள் வந்தார்கள் அளவாளவினார்கள்

சுற்றங்கள் சூழ இருந்தார்கள்

யாரையும் சிந்தாமல் சிதறாமல்

சேமித்துக் கொடுத்தவை

சொத்து பத்து சம்பத்துகள்

எவரையும் விலக்கி விட முடியாத

பிணைப்பிற்குள் வைத்திருந்ததைப் பார்த்த பின்

அவை முன்

மண்டியிட்டு கண்ணீர் உகுத்தேன்

எம்மைப் பார்த்துக் கொள்ளும் வரை

உம்மைப் பார்த்துக் கொள்ள வேண்டியது

நீ இதுவரை வணங்காத கடவுளின் கட்டளை என்றன

முதன் முறையாக வணங்காத கடவுளின் பக்கம் நோக்கிய போது

அப்படி ஏதும் இருக்கின்றனவா என்பது போல

பரிகசித்துச் சிரிக்கத் தொடங்கின

*****