கடவுளுக்காகப் பிரார்த்தித்தல்

கடவுளுக்காகப் பிரார்த்தித்தல்

நான்கு பேர் கூட நன்றாக நிற்க முடியாது

வாகனத்தில் வந்தால் நடுசாலையில் நிறுத்த வேண்டியதுதான்

ஐந்து ஆறு என்றால் சாலை மறியல் ஆகி விடும்

ஒதுங்க இடமில்லையென்றால்

சுவர் மறைவில் பல்லிப் போல ஒதுங்கி

கண்களை மூடிக் கொண்டு சிறுநீர் பெய்து விடுகிறார்கள்

யாவற்றையும் நாலாபுறமும் நான்கு சிலைகள்

உட்கார்ந்து பார்த்துக் கொண்டுதான் இருக்கின்றன

தினமும் ஐயர் வருகிறார்

பூஜை புனஸ்காரங்கள் நடக்கின்றன

மக்கள் வருகின்றனர் வரிசை முறைப்படி

அர்ச்சனைகள் தொடர்கின்றன

கடவுள் மேல் மக்களுக்கு நம்பிக்கை இருக்கிறது

சின்ன கோயில் என்றாலும்

ஒரு நாள் விடாமல் வருபவர்கள் இருக்கிறார்கள்

வருவோர் போவோர் யார் பிரார்த்திக்கா விட்டாலும்

நான் பிரார்த்திக்கிறேன்

இன்னும் கொஞ்சம் நாலாபுறமும்

இடம் விரிவாக்கித் தந்தால்

கோயிலை நான்கு முறை சுற்றி வரலாம்

நீயென்னவோ வேண்டுவோருக்கு எல்லாம் தந்து

உன்கேதும் இல்லாமல் இருந்து கொள்கிறாயே கடவுளே

*****