இல்லாத நாட்களில் இருப்பதைக் காட்டி
அடிக்கடி நிலவைக் காட்டிச்
சோறூட்ட
அலுத்துக் கொண்ட நிலா
அமாவாசை நாளில் காணாமல் போனது
காணாமல் போன நிலாவை
யாரும் தேடாதது கண்டு
யாரைக் காட்டிச் சோறூட்டுகிறார்கள்
என்று
ஒவ்வொரு நாளாய் எட்டிப் பார்த்தது
இருக்கின்ற நாளில்
இருப்பதைக் காட்டிச் சோறூட்டுபவர்கள்
இல்லாத நாளில்
இருக்கின்ற வேறொன்றைக் காட்டிச்
சோறூட்டுவதைப் பார்த்த பின்
யாரை நம்பியும் யாரும் சோறூட்டுவதில்லை
என்பதைப் புரிந்து கொண்டது
இப்போதெல்லாம் நிலா
அதுவாகத் தோன்றுகிறது
அதுவாக மறைகிறது
சில நாட்களில் காணாமல் போகிறது
இருக்கின்ற நாளில் நிலவைக்
காட்டிச்
சோறூட்டுபவர்கள்
இல்லாத நாட்களில் இருட்டைக்
காட்டியும்
சோறூட்டுகிறார்கள்
*****
No comments:
Post a Comment