காற்றின்றிச் சூழலும் காற்றாடி
காற்றாடி சுற்றுகிறது. அதன் கீழே உள்ள ஒன்றரை அல்லது ஒன்றே முக்கால்
சதுர அடிக்கு மட்டும் காற்று உசும்புகிறது.
காற்றாடி கணக்காய்ச் சுழன்று கணக்காய்க் காற்றைத் தருகிறது.
அதற்கு மேல் காற்றைச் சுழலச் செய்ய வேறெங்கும் காற்றில்லை. சமயங்களில் அந்த அளவுக்குக்
காற்றாடியைச் சுழலச் செய்ய மின்சாரமும் இல்லை. காற்றாடி வியர்த்துப் போய் வியர்வை ஒட்டடை
பெருக்கெடுக்க ஓய்வெடுத்துக் கொண்டிருக்கிறது.
ஒவ்வொருவர் தலைக்கும் மேல் ஒரு காற்றாடி சுழன்றால் நிலைமையைச்
சமாளிக்கலாம். அதற்குத் தேவையான மின்சாரத்தை நாம் எங்கிருந்து கொண்டு வரலாம்?
ஒரு காற்றாடியை இருவர் பகிர்ந்து கொள்வதெல்லாம் வேலைக்கு ஆகாது.
அப்படிப் பகிர்ந்து கொண்டால் இன்னொருவர் உடல் தொப்பல்தான். பகிர்ந்து கொள்ளும் காற்று
பத்து மடங்கு உஷ்ண பிரஜையாகி விடும்.
காற்றோட்டம் குறைந்திருக்கிறது. திரைப்படங்களில் காட்டுவார்களே,
காற்று நின்றது போல ஒரு காட்சியை. அப்படி ஒரு காட்சியைத்தான் இந்தக் கோடையில் நாடெங்கும்,
ஊரெங்கும், தெருவெங்கும், சந்து பொந்து எங்கும் காண முடிகிறது.
சில நேரங்களில் சுழன்றடிக்கும் காற்று இருக்கிறதே, அது எல்லாவற்றையும்
பிடுங்கிக் கொண்டு செல்கிறது. அது சுழன்றடிக்கும் சூறாவளிக் காற்று. காய்ந்த மாடு கம்பங்
கொல்லையில் பாய்ந்தது போல என்ற உவமையைப் புரிந்து கொள்ள அந்தக் காற்று உதவுகிறது. பிடுங்கப்பட்ட
காற்று பிடுங்கிக் கொண்டு போவதைப் போல அப்படி ஒரு சுழற்சி.
அரசியல்வாதிகளின் தேர்தல் பரப்புரைகளைச் சூறாவளி சுற்றுப்பயணம்
என்று சொல்லி பழக்கப்பட்டவர்கள் அல்லவா நாம். இப்போது இந்தச் சூறாவளிக் காற்றைப் பார்க்கும்
போது காற்று சூறாவளி சுற்றுப்பயணம் செய்கிறது என்று தாராளமாகச் சொல்லலாம். இந்த சுற்றுப்பயணம்
எந்த ஓட்டைப் பிரிப்பதற்கு என்பதுதான் தெரியவில்லை.
*****
No comments:
Post a Comment