2022 இல் இருந்து இருந்து கொண்டு 2022 ஐ எழுதுதல்
2022 வது ஆண்டில் இருந்து கொண்டு 2022 வது ஆண்டைப் பற்றி எழுதக்
கூடாது. அப்படி எழுதுவது இலக்கியமாகாதுஎன்று எழுத ஆசைப்பட்ட நாளிலிருந்து ஓர் இலக்கிய
நண்பர் சொல்லிக் கொண்டிருக்கிறார். அது நாட்குறிப்பாகி விடும், பிரசுரம் ஆனால் ஒரு
செய்தியாகி விடும் என்று என்னை எச்சரித்திருக்கிறார்.
எச்சரிக்கையை மீறுவது தர்ம அதர்மம் மற்றும் சட்ட அசட்டம் மற்றும்
நியாய அநியாயம் மற்றும் நட்பு விரோதம்.
எச்சரிக்கையையும் மீறிதான் 2022 வது ஆண்டைப் பற்றி 2022 வது
ஆண்டிலேயே எழுதுகிறேன். இது எப்படி என்றால் தன்னைச் சுட வரும் எதிரியிடம் சுடுடா என்று
எதிரில் போய் நிற்பது போன்றதாகும். சுட்டு விட்டால் அதுவும் குறி பார்த்து சுட்டு விட்டால்
அது தோசையையோ, சப்பாத்தியைச் சுடுதல் போன்றதல்ல. இங்கு சுடுதல் என்பது துப்பாக்கியால்
சுடுதல்.
துப்பாக்கியின் சுடுதலைப் போல வெயிலின் சுடுதலும் இருப்பதால்
தைரியம் இயற்கையாகப் பிறந்திருக்க வேண்டும். அப்படி ஒரு தைரியத்தில் என்னையும் அறியாமல்
இது எழுதப்படுகிறதோ என்று எனக்குச் சந்தேகமாக இருக்கிறது. இப்படி ஒரு சுடுதலை அதாவது
சூட்டை அதாவது துப்பாக்கிச் சூட்டைப் போன்ற சூட்டை வேறெந்த ஏப்ரல், மே மாதங்களில் நான்
அனுபவித்ததில்லை. இந்த 2022 இன் ஏப்ரல், மே மாதங்களே என்னை வெயில் என்ற வாணலியில் போட்டு
கிள்ளுக் கீரையை வதக்குவது போல வதக்குகிறது.
ஒரு சூளையில் அடைபட்ட செங்கல்லைப் போல நான் சுடப்படுவது நன்றாக
எனக்குத் தெரிகிறது. துப்பாக்கியால் சுடுபவர் ஒரு பக்கமாகச் சுடுவார். இந்த வெயில்
ரொம்பவே வித்தியாசம். நானா பக்கங்களிலிருந்தும் சுடுகிறது. சுட்டுச் சுட்டுச் சல்லடையாய்த்
துளைக்கிறது. ஒவ்வொரு துளையிலிருந்தும் இரத்தத்தைப் போல வியர்வை. வழிந்து கொட்டுகிறது.
துப்பாக்கியால் சுட்டவரை ஐ.சி.யு.வில் வைத்துக் காப்பாற்ற முயல்வதைப்
போல வெயில் சுட்ட என்னை ஏ.சி.யில் வைத்துக் கொஞ்சம் ஆசுவாசம் செய்து கொள்ள வேண்டியிருக்கிறது.
இதற்காகவே கோடை பிறந்தால் ஏ.சி. உள்ள கடைகளாகப் பார்த்து ஷாப்பிங் செய்வதை வழக்கமாக
வைத்திருக்கிறேன். பார்ப்பவர்களுக்கு அது ஷாப்பிங். எனக்கு மட்டும்தான் தெரியும் அது
வெயிலிலிருந்து எஸ்கேப்பிங்.
ஊட்டி, கொடைக்கானல் தூரம். காசு பிடிக்கும் விவகாரம். ரொம்ப
காசு கேட்டால் பழைய சோற்றைத் தின்று விட்டு கருவை மரத்தடியில் போய் படுடா என்று பார்சல்
செய்து விடுவார்கள். கருவ மரத்தடியில் பெரிய எறும்புகள் வருவதைப் போல ஊட்டி, கொடைக்கானல்
கனவுகள் வாராது.
மேற்படி பிரச்சனை பந்து மித்ர சகிதம் பார்த்தால் ஏசி கடைகள்
பக்கம். ஏசி பஸ்ஸில் ஏறி ஏசி கடைகளில் இறங்கி இரண்டு மூன்று மணி நேரத்துக்கு ஊட்டி,
கொடைக்கானலில் சுற்றுவது போல சுற்றி விட்டு ஐந்து ரூபாய்க்கு ஒரு பிஸ்கெட் பாக்கெட்டையோ,
இரண்டு ரூபாய்க்கு ஒரு சாக்லேட்டை வாங்கினாலோ வந்த சோலி முடிந்து வெயில் காலி என்ற
சந்தோஷப் பெருக்கு.
2022 இன் இந்த அனுபவத்தை 2022 இல் எழுத இன்னொரு முக்கிய காரணம்,
2022 இல் இருப்போர்க்குப் பயன்பட வேண்டும் என்பதும்தான். 2023 பிறந்து விட்டால் அதற்கான
அணுகுமுறை வேறாகத்தான் இருக்கும். அப்போது 2022 ஐ எழுதினால் கால எந்திரத்தில் பயணித்து
வந்தா நீங்கள் 2022 இல் அனுபவித்த வெப்பத்தைத் தணித்துக் கொள்ள முடியும்?
இந்த எழுத்து நல்ல இலக்கியம் ஆகா விட்டாலும் நான்கு பேருக்குப்
பயன்பட்டால் போதும். அந்த போதும் என்பதை நினைத்துதான் போதாமையைப் பொருட்படுத்தாமல்
எழுதுகிறேன்.
உங்கள் வெப்பச் சூழல்தணியட்டும். அத்துடன் மனப்புழுக்கம் குறையட்டும்.
*****
No comments:
Post a Comment