ஞான வெளிச்சம் தரும் சின்ன சின்ன டியூப்லைட்டுகள்

ஞான வெளிச்சம் தரும் சின்ன சின்ன டியூப்லைட்டுகள்

இப்போல்லாம் யார் சார் புக் படிக்கிறா?

நீங்க படிக்கிறீங்களா?

யாரும் படிக்கிறதில்ல. நானும் படிக்கிறதில்ல.

ரொம்ப நல்ல விசயம்தான் சார்.

படித்ததனால் அறிவு பெற்றோர் ஆயிரம்தான் உண்டு

படிக்காமல் அறிவு பெற்றோர் நீங்கள் ஒருவர்தான் உண்டு

அதை நினைத்து தாழ்வு மனப்பான்மை

அடையாதீங்க சார் ப்ளீஸ்.

*

இப்படியே போனா கோடாம்பட்டி வருமா சார்?

முதல்ல போங்க போயிட்டே இருங்க சார்.

தேங்க்யூ சார்.

தேங்க்யூல்லாம் வேணாம். நீங்க போனா கண்டிப்பா வரும் சார்.

*

என்ன சார் ரோடு இது?

ரொம்ப மோசம்தாங்க சார் ரொம்ப ரொம்ப மோசம்.

காசைப் போட்டுக் காரை வாங்குனா இப்படியா?

இனுமே காரை வாங்குறப்பவே ரோட்டையும் சேர்த்து வாங்கணும் சார்.

*

பேப்பர்ல நியூஸே இல்லங்க தம்பி.

அடப் பாவிகளா வெறும் பேப்பரை அச்சடிச்சு கொடுக்க ஆரம்பிச்சிட்டானுங்களா?

நீங்க வேற தம்பி. நாம்ம எதிர்பாக்குற மாதிரி நியூஸ் இல்ல தம்பி.

நீங்க எந்த மாதிரி எதிர்பாக்குறீங்க?

அது வந்து தம்பி… அது வந்து என்னான்னா தம்பி… அதெ எப்படிச் சொல்றது தம்பி… போங்க தம்பி… சொன்னா புரியாது. உங்களுக்கு எல்லாத்துலயும் விளையாட்டுதான்.

*

அந்தக் காலம் மாதிரி இந்தக் காலம் இல்லீங்க.

நான் எப்படிங்க நம்புறது?

நம்பணும் தம்பி. பெரியவங்க சொல்றதெ நம்பணும்.

நாம்ம நம்புறாப்புல இல்லைங்க.

நீங்க நம்புறதுக்கு என்ன பண்ணணும்ன்னு சொல்லுங்க.

ஒரு டைம் மிஷின் வாங்கித் தாங்க. போய் பாத்துட்டு வந்து நம்புறேன்.

ஏம்ப்பா தம்பி கேக்குற மிஷின் எந்தப் பர்னிச்சர் கடையில்ல இருக்குச் சொல்லுங்க. அத தம்பிக்கு வாங்கியாந்துக் கொடுத்துட்டுத்தாம் மறுவேல பாக்கணும். எம் பேச்சையே நம்ப மாட்டேங்றாப்புல.

*****