தொடர்மழைப் பெய்வதாகச் சொல்பவர்கள்

தொடர்மழைப் பெய்வதாகச் சொல்பவர்கள்

இன்றொரு நாள் சிறு பொழுது

வெயிலுக்கு வாய்ப்பிருக்குமா என்று பார்க்கிறேன்

வானம் மழையைக் கொட்டியபடி இருக்கிறது

மனவெளியெங்கும் நசநசத்துக் கிடக்கிறது

பள்ளங்கள் ஏதுமின்றிச் சாலை நிரம்பியிருக்கிறது

குடைகள் விரிய அடியில் கவிந்து கிடக்கிறது இருள்

தொடர்ந்து வரும் நாட்களில் நிற்காது பொழியும் மழை

கடந்த காலத்தின் கறைகளை அடித்துக் கொண்டோடுகிறது

மரங்களில் ஒதுங்கியிருக்கும் பறவைகள்

நிமிடத்திருக்கொரு முறை சிலுப்பியபடி

மழைநீரைக் கொத்தியபடி அமர்ந்திருக்கின்றன

காயாத ஆடைகளை உலர்த்தியபடி இருக்கும் பெண்கள்

பெய்யெனப் பெய்யும் மழையைச் சபித்தபடி இருக்கிறார்கள்

இன்றொரு நாள் விடுமுறை எடுத்துக் கொள்ளும் நினைப்பில்

அலைபேசி  அழைப்பு மண்ணள்ளிப் போடுகிறது

கனமழையைப் பொருட்படுத்தாமல் மழைக்குள் நுழைகையில்

மழைக்குள் இயங்கும் உலகம் ஒரு பேருண்மையைப் பேசுகிறது

மழையின் போக்குக்கு மழை பொழிந்து கொண்டிருக்கிறது

வேலையின் போக்குக்கு வேலைகள் நிகழ்ந்து கொண்டிருக்கின்றன

மழையோடு மழையாகி விடுபவர்களுக்கு நனைதல் ஒரு பொருட்டில்லை

மழையை வேடிக்கைப் பார்த்து அலுத்துப் போனவர்கள்

தொடர் மழை பெய்து கொண்டிருப்பதாகச் சொல்லிக் கொண்டிருக்கிறார்கள்

*****