மறதியில் கரைந்து போகும் நினைவுக் குறிப்புகள்

மறதியில் கரைந்து போகும் நினைவுக் குறிப்புகள்

மனித சுபாவங்கள் வித்தியாசமானது

பெருங்காட்டின் மிருகங்களைப் போலவும் தாவரங்களைப் போலவும்

எல்லாரையும் மன்னித்து விடுவது நல்லது

கலைந்துப் போகும் மேகங்களைக்

கணக்கில் எடுத்துக் கொள்ளாத வானத்தைப் போல

கண்டிக்கவோ தண்டிக்கவோ வேண்டியதில்லாத போது

மனக்கடலின் கொந்தளிப்புகள்

மழைநீர் விழுந்த தீயாய் அடங்கிப் போகின்றன

பின்தொடரும் நாட்களிலிருந்து பார்க்கையில்

கடந்து போன நாட்கள் உதிர்ந்து போன இலைகள்

இலைகள் துளிர்ப்பதும் உதிர்வதும்

கால மரத்தின் கணக்குப் புத்தகத்தில் அடங்காதவை

இஷ்டம் போல் மாற்றிக் கொள்ளும் நினைவின் அமீபாக்கள்

ஒவ்வொரு நேரத்திலும் ஒவ்வொரு உருவிலானவை

அழகோ அழகற்றதோ பேதமின்றிச் சிதைக்கும்

மண்ணுக்கு எதுவும் முக்கியமில்லை

வெறுப்பு வன்மம் வெறி என எல்லாவற்றையும்

கண்டும் காணாமல் செரித்தபடி சுழன்று கொண்டிருக்கும்

பூமியின் நினைவுக்குறிப்புகளில்

நிறைந்திருக்கின்றன மறதியின் வடுக்கள்

*****