நீர் மேல் செல்லும் வாகனங்கள்

நீர் மேல் செல்லும் வாகனங்கள்

சாலையில் செல்லும் இரு சக்கர வாகனம்

பெருக்கெடுக்கும் நீர் மேல் செல்லத் தொடங்குகிறது

மஞ்சளும் பழுப்புமாய் வெள்ளநீர்

திடீரெனப் பச்சையாய் உருமாறி ஆறெனப் பெருக்கெடுக்கிறது

தண்ணீரில் செல்லும் போது

விசையை முறுக்கியபடிச் செல்லுங்கள் என்ற

எச்சரிக்கை வாசகம் எங்கும் கேட்கிறது

இதற்கு மேல் நீர் மேல் பயணம் இயலாதென திரும்ப எத்தனிக்கையில்

எங்கே தொடங்குகிறது எங்கே முடிகிறது எனப் புரியாத

பெருவெளியாய் கடலைப் போலச் சூழ்கிறது நீர்

பயணித்துக் கொண்டிருப்பதைத் தவிர

வேறு வழியில்லை என்ற அறிவிப்பு கேட்க தொடங்குகிறது

பின்னால் அமர்ந்திருப்பவர்கள் முன்னால் இருப்பவர்களைக்

கெட்டியாகப் பிடித்துக் கொள்ளுங்கள் என்ற கரிசன வார்த்தைகளை

அருகருகே சென்று கொண்டிருப்பவர்கள் உதிர்க்கிறார்கள்

எரிபொருள் தீரும் வரை இயங்கும் வாகனம்

தீர்ந்த பின் நீரின் போக்கில் அடித்துச் செல்லப்படுவதும்

பயணத்தின் தொடர்ச்சியாகப் பதியப்படலாம்

தரையில் தொடங்கி நீர்ச்சுழலில் சிக்குவதாய்

ஒவ்வொரு நாளின் பயணத்தின் முடிவிலும்

எப்படித் தப்பித்து எங்கே கரையேறி

மறுநாள் பயணத்தைத் துவங்குகிறேன் என்பதை

அறிந்து கொள்வதற்குள் கனவுகள் முடிந்து விடுகின்றன

மறுநாள் கனவுகள் வழக்கம் போல்

சாலை மேல் செல்லும் வாகனங்கள்

நீர் மேல் செல்லப் போகும் படகுகளாய் மாறத் தொடங்குகின்றன

விசையை முடுக்கியபடி நீரில் செல்கின்றன வாகனங்கள்

*****