இயல்பாதல்

இயல்பாதல்

அவர்கள் நம்பிக்கையை உடைக்கப் பார்க்கிறார்கள்

நம்பிக்கையை உடைப்பது அவர்களுக்கு விளையாட்டு

முடக்குவதற்கான உபாயங்களைக் கையாள்வது

அவர்களின் தந்திரமான பொழுதுபோக்கு

ஒவ்வொன்றும் அவர்களை எதிர்ப்பது

அபாயகரமானது என்பதை மறைமுகமாகச் சொல்வன

அவர்களின் விசயங்களில் தலையிடக் கூடாது

அவர்களின் விசயங்களில் மூக்கை நுழைக்கக் கூடாது

அவர்களை மாற்றவோ திருத்தவோ முயற்சிக்கக் கூடாது

மீறுபவர்கள் உளவியல் ரீதியாகச் சிதைக்கப்படுவார்கள்

மன உளைச்சலில் சிறைவைக்கப் படுவார்கள்

இயல்பாகக் கிடைக்க வேண்டியவற்றை

அவர்கள் கிடைக்க விடாமல் செய்வார்கள்

ஆம் நீங்கள் நினைப்பது சரிதான் அது அப்படித்தான்

அவர்கள் ஆதிக்க வர்க்கத்தைச் சேர்ந்தவர்கள்

என்பதை நிரூபிக்க என்ன வேண்டுமானாலும் செய்வார்கள்

அதற்கான திமிர் அவர்களின் ரத்தங்களில் கலந்திருக்கிறது

அது அவர்களுக்கு இயல்பானது

போராடுபவர்கள் போராடித்தான் ஆக வேண்டும்

அவர்கள் எதைச் செய்தாலும்

சுண்டிப் போய் நின்று விட்ட

ரத்த ஓட்டத்தை ஓடச் செய்ய

எதாவது செய்துதான் ஆக வேண்டும்

போராட்டத்தில் இயங்குதல் இயல்பாகும் வரை

மாற்றங்களை நிகழ்த்துவது இயல்பாவதில்லை

*****