மாபெரும் தவறு

மாபெரும் தவறு

செய்நேர்த்தியும் பேரழகும் மிகுந்த சாலையை

வடிவமைத்ததைக் காட்டிப் பெருமைப்பட்டவர்

இயற்கையின் படைப்பில் இல்லாத ஒன்றைப் படைத்து

பயணங்களை ரம்மியமாக்கி விட்டதாகச் சிலாகித்தார்

கட்டுக்கோப்பு குலையாமல்

வாகனங்கள் செல்வதும் போவதும்

வான வெளியின் கோள்களின் இயக்கத்தை ஒத்திருப்பதை

நினைவூட்டிச் சரிபார்க்க சொன்னார்

திட்டமிட்ட ஆக்கத்தால் இயற்கையின் குறைகளின்றி

எதையும் உருவாக்குவது சாத்தியம் என்ற

வருங்கால தரிசனத்தை முன் வைப்பதாய் சாசுவதம் உரைத்தார்

அளவை விஞ்சும் அற்புதத்தைக் காட்டுவதென

வேகம் அதி வேகமென உருமாறுவதால்

எண்பதாண்டு வாழ்வில் எண்ணூறாண்டு ஆயுளை

அநாயசமாய் வாழும் கால விரிவை விரித்துக் காட்டினார்

மரங்களும் பறவைகளும் இல்லாத சாலையைச்

சுட்டிக் காட்டிய போது

மாபெரும் தவறு நிகழ்ந்திருப்பதை

மௌனமாய் ஒத்துக் கொண்டார்

*****