எறும்பு மனிதர்களின் வாழ்க்கை
எறும்புகளாகி விட்ட மனிதர்கள்
மாநகரச் சாலைகளில் ஊர்ந்து
கொண்டிருக்கிறார்கள்
ஒருவர் பின் ஒருவர் செல்வதும்
ஒருவர் பின் ஒருவர் மீள்வதும்
வீடென்னும் புற்றை அடைவதும்
நாளுழைப்பைப் புற்றில் சேமிப்பதும்
உழைப்பில்லா நாளில் செலவழிப்பதும்
எறும்பு மனிதர்களின் செய்கைகளாகி
விட்டன
இன்னும் எறும்புகளாகாத மனிதர்கள்
மாநகரச் சாலைகளின் இரு மருங்கிலும்
இருக்கும்
நகலகங்களில் தங்களை எறும்புகளாய்ப்
பிரதி எடுக்க
வாயில் ஓரங்களில் நின்று
கொண்டிருக்கின்றனர்
எறும்பு வாழ்க்கை குறித்த
அசூயை இல்லாத மனிதர்கள்
எறும்புகளைப் பார்க்கவும்
நேரமின்றி நகர்ந்து கொண்டிருக்கின்றனர்
எறும்புகளுக்கான வாழ்க்கையோடு
ஓர்மையின்றி
மாநகரச் சாலைகள் எறும்புகளைப்
போல ஓடிக் கொண்டிருக்கின்றன
******
No comments:
Post a Comment