கள்ளச் சிரிப்பு சிரிக்கும் வாழ்க்கையின் பொருள்

கள்ளச் சிரிப்பு சிரிக்கும் வாழ்க்கையின் பொருள்

கால்களின் நகர்வு

புதிய ஊரை நோக்கியா

புதிய ஊரை உருவாக்கவா என்பதை

காலமொன்றே அறியுமோ

நகர்வின் முடிவில் கால்கள் அறியுமோ

நகரும் கால்களில் உத்வேகம் ஏறும் போது

வேகமாக நடக்கும் தொனியில்

தன்னை அறியாமல் இனம் புரியாத

நம்பிக்கையை விதைத்துக் கொள்கின்றன கால்கள்

நடக்க நடக்க

இருப்பதெல்லாம் ஊர் என்பது புலப்பட

கடந்து வந்தப் பாதையைத் திரும்பிப் பார்க்கின்றன கால்கள்

நிலைத்திருக்கும் கால்களுக்குப்

புதிய ஊர்கள் தேவைப்படுகின்றன

பயணப்படுகின்ற கால்களுக்கு

உலகமே ஓர் ஊர் என்றாகிறது

நகர்தலின் சாத்தியத்தில் சுழல்கின்றன

மைய அச்சை நோக்கும் பொருள்கள்

இருப்பிற்கும் இருப்பின் உடைதலுக்கும் இடையே

கள்ளச் சிரிப்பு சிரிக்கிறது வாழ்க்கையின் பொருள்

*****