கிரியா ஊக்கிகளின் சமத்கார பசை

கிரியா ஊக்கிகளின் சமத்கார பசை

டாக்டரெனச் சொல்லப்பட்டவள்

நோயாளியாய்ப் படுத்திருக்கிறாள்

இன்ஜினியரெனப் பெருமிதப்படுத்தப்பட்டவன்

உடைந்த வீட்டில் குடியிருக்கிறான்

போலீஸ்தானெனப் பேசப்பட்டவன்

கைதியாய் அடங்கிக் இருக்கிறான்

வாத்தியார் ஆவானென வாஞ்சையாய்ப் பேசப்பட்டவன்

மொழி புரியாத தூர தேசத்தில்

துயரப்பட்டுக் கொண்டிருக்கிறான்

எதுவும் சொல்லாமல் இருந்திருக்கலாமோ

ஏதோ ஒன்றைச் சொல்லி கனவுகளைக் கிளர்ந்து

எதிர்காலத்தில் சீழ் வடியச் செய்து விட்டோமோ

ஊக்கங்கள் ஊனப்படுத்தாமல் இருந்திருக்கலாம்

எதிர்ப்பேச்சைச் சமத்காரமாய் அடைக்க

திமிர்ந்தெழுவதைச் சாமர்த்தியமாய்த் தடுக்க

ஊக்கியின் அடிமையென ஆகி

அடிமைச் சேவகம் புரிந்து அடி வருட

ஊக்கிக் கொண்டே இருக்க வேண்டும்

ஊக்கத்தின் கனம் தாளாமல்

மூழ்கிக் கொண்டிருந்தால்

யார் மேலெழப் போகிறார்கள்

கலெக்டர் ஆவானெனச் சொல்லப்பட்டவன்

கலெக்டர் ஆக மாட்டான் என்பதும்

கலெக்டர் ஆபிஸ் முன்

வருவோர் போவோருக்கு

மனு எழுதிக் கொடுத்துக் கொண்டிருப்பான் என்பது

தெரியாமலா ஊக்கப்படுத்திக் கொண்டிருக்கிறார்கள்

கேட்டால் கிரியா ஊக்கி என்பார்கள்

சமத்கார சாமர்த்தியசாலிகள்

*****