இருக்கிறீரா இல்லையா கடவுளே

இருக்கிறீரா இல்லையா கடவுளே

கடவுளிடம் வேண்டுகிறேன்

அவரின் பிம்பங்களை உடைத்து நொறுக்குகிறார்கள்

பிம்பங்கள் உடைவது குறித்த

பிரக்ஞை அவரிடம் இல்லை

மீண்டும் என்னை உங்களோடு சேர்த்து வையுங்கள் என்கிறேன்

தண்ணீரைத் தண்ணீரோடு சேர்த்து வைப்பதா

என்பதைப் போன்ற கேலிப் புன்னகையை உதிர்க்கிறார்

நீயே உருவாக்கியதில் நீயே சேர்ந்து கொள் என்றபடி

காலாவதியாகிவிட்ட தலைவரைப் போலக் கடந்து செல்கிறார்

மற்றொரு கணத்தில் என்னைப் பிரித்து வையுங்கள் என்கிறேன்

உதிர்ந்து விழும் பழத்தை

எந்தக் காம்பு தாங்கிக் கொண்டிருக்கப் போகிறது

என்பதையொத்த மௌனத்தை அடைகாத்துக் கொண்டிருக்கிறார்

ஓடி விடுவதானால் காலிருக்கும் போதே செய்து விடு

என்ற அசட்டுப் புன்னகையை வீசுகிறார்

இருக்கிறீரா இல்லையா என்ற கேள்விக்கு

பதிலுரைத்தால் ஏதோ ஒன்றை

ஒத்துக் கொள்வது போலாகி விடும் என்று சிரிக்கிறார்

என்னதான் செய்வதென்றால்

என்னைக் குறித்து எதுவும் செய்யாமலிரு என்கிறார்

அதெப்படி எதுவும் செய்யாமலிருப்பது என்றால்

அதற்கும் சிரித்துக் கொள்கிறார்

பிம்பங்கள் மௌனமாக உடைவதன் சத்தம்

பிரபஞ்சமெங்கும் கேட்கிறது

எதுவும் நிகழாததைப் போல அமர்ந்திருக்கிறார் கடவுள்

*****