மேட் இன் யுவர் வில்லேஜ்
நாங்க சின்ன வயசா இருந்தப்போ வெளிநாடு போயிட்டு வர்ற மாமாமார்க,
பெரியப்பாமார்க, சித்தப்பாமார்க, அண்ணன்மார்க வாங்கியார்ற டிவி, டெக், டேப் ரிகார்டர்
எல்லாத்துக்கும் ஒரு மவுசு இருந்துச்சு. காரணம் அதெல்லாம் மேட் இன் ஜப்பான். ஜப்பான்
பொருளுன்னா ஒரு தரம் இருக்கும்ங்ற நெனைப்புதாம் அதுக்குக் காரணம்.
மேட் இன் ஜப்பானுக்குப் பெறவு குழந்தைகளுங்கு வாங்குற பொம்மையிலேந்து
குழந்தைங்க வாங்கித் திங்குற கொய்யாக்கா முட்டாய் வரைக்கும் பெரிய புரட்சி பண்ணது மேட்
இன் சைனாதான். என்ன விதமான கச்சடா சாமான் வேணும்னாலும் மேட் இன் சைனா சாமானுங்க நம்ம
ஊர்லயே கிடைக்கும். சைனா சாமானுங்க சைனாவுலதானே கிடைக்கணும். அப்படில்லாம் எந்த லாஜிக்
இல்லேங்ற மாதிரிக்கு கொட்லாம்பட்டியிலயும் கிடைக்கும். ஆனா இப்படி நம்ம நாட்டு சாமான்
செட்டுங்கள சைனாவுல கொண்டு போய் வித்துட முடியுமா என்ன?
நம்ம நாட்டுக்கு மேட் இன் இந்தியான்னு சிறப்பு ஏதும் இல்லையான்னு
கேட்டா, நம்ம நாட்டுல இருக்குற ஒவ்வொரு ஊருக்கும் அப்படி மேட் இன் சிறப்பு இருக்குது.
அதெ எந்த நாட்டுக்காரனும் அடிச்சிக்க முடியாது. மத்த நாட்டுக்காரங்க தங்களோட சாமானுங்கள
உலக அளவுல கொண்டு போயிட்டாங்க. நாம்ம கொண்டு போகல. அது ஒண்ணுதாம் வித்தியாசம்.
மணப்பாறை மாடு கட்டி, மாயவரம் ஏரு பூட்டின்னு மருதகாசியோட பாட்டு
ஒண்ணு வருமே. இந்தப் பாட்டே மேட் இன் சிறப்புக்கு நல்ல ஓர் உதாரணந்தாம். அந்தப் பாட்டுலேயே
ஆத்தூரு கிச்சிடி சம்பா, விருதுநகர் வியாபாரின்னு நெறைய மேட் இன் சிறப்புக வரும். கடைசியில
நம்ம பெத்த அம்மாதாம் மேட் இன் சிறப்புலயே ரொம்ப ஒசத்திங்றதையும் சொல்லிப்புடுவாரு. அந்தப் பாட்டைக் கேட்க கீழே சொடுக்குங்க.
அதுவுமில்லாமே அல்வான்னா நீங்களே சொல்வீங்களே மேட் இன் திருநெல்வேலி,
பால்கோவான்னா மேட் இன் திருவில்லிபுத்தூர், பஞ்சாமிர்தம்ன்னா மேட் இன் பழனி, முறுக்குன்னா
மேட் இன் மணப்பாறை, பூட்டுன்னா மேட் இன் திண்டுக்கல், பட்டுன்னா மேட் இன் காஞ்சிவரம்,
லட்டுன்னா மேட் இன் திருப்பதி, தலையாட்டி பொம்மைன்னா மேட் இன் தஞ்சாவூர்ன்னு.
இப்படி நிறைய நம்ம நாட்டுல
மேட் இன் சிறப்புக்கு நிறைய ஊருங்க இருக்கு. நம்ம நாட்டுல இருக்குற ஒவ்வொரு ஊருக்குமே
இப்படி மேட் இன் சிறப்புக இருந்திருக்கும். ஒவ்வொரு ஊரோட பழைய வரலாற்ற அகழாய்வு பண்ணிப்
பாத்தா அதெ தெரிஞ்சிக்கிடலாம். அப்படி இருந்ததை அப்போ சரியா வளத்திருந்தா நம்ம ஊருக
ஒவ்வொண்ணும் குட்டிச் சிங்கப்பூரா இருந்திருக்கும். ஏதோ அப்போ செய்யல. இனிமேலாவது அதை
சரியானபடிக்குப் போற்றி வளர்த்தாலே இந்தியாவுல இவ்வளவு மேட் இன் சிறப்புகளான்னு உலகம்
மூக்குல விரல வைக்கும். ஆனா நம்ம நாட்டுல தொழிலாளிங்க வயித்துலல்ல கைய வைக்குற வேலையத்தானே
மொதல்ல பாக்குறாங்க. அதாலத்தாம் நம்ம நாட்டுல மேட் இன் சிறப்புக நிறைய உருவாக மாட்டேங்குது.
உருவாகியிருக்குற ஒரு சில சிறப்பான விசயங்களும் நம்ம நாட்டுல தக்க வெச்சுக்க முடியாம
போராடிக்கிட்டு கெடக்குதுங்க.
*****
No comments:
Post a Comment