காணாமல் போன கதைகள்

காணாமல் போன கதைகள்

கதை சொன்ன பாட்டி

கனைத்துக் கொள்கிறாள்

திருடன் போலீஸ் கதை சொன்ன போது

வெற்றிலையையும் சுண்ணாம்பையும்

களவாடிச் சென்று விட்டார்கள் என்கிறாள்

பையில் இருக்கும் குட்கா பாக்கெட்டை எடுத்து

வேண்டுமா என்கிறான் பதின்ம வயது பேரன்

நள்ளிரவில் நசுவினிக் குரலில்

பேய்களும் பிசாசுகளும்

கொரோனா வந்து செத்து விட்டதெனப் புலம்புகிறாள்

அன்றோடு பேய்க்கதைகளும் பிசாசுக் கதைகளும்

முடிவுக்கு வந்த போது

சாமிக் கதைகளைச் சொல்லும் போதெல்லாம்

வாயிழுத்துக் கோணிப் போனாள்

கடவுளும் கைவிட்டுப் போயிட்டானடி

என்று அடிக்கடி அரற்றினாள்

கதையொழிந்த ஒரு நாளில்

ராஜாவையும் ராணியையும்

கடத்திச் சென்றுவிட்டார்கள்

என்று புலம்பும் பாட்டியை

என்ன சொல்லி ஆற்றுவது

ஒரு நாளில் அவளும் காணாமல் போனாள்

தில்லையம்பல கோயிலின் முன்

பிச்சையெடுத்துக் கொண்டிருப்பதாகப்

பார்த்தவர்கள் சொல்லிப் போனார்கள்

வீட்டில் இருப்பவர்களுக்கு

அழைத்து வர வேண்டுமோ என்ற

குழப்பத்தில் அப்படியே இருந்து விட்டார்கள்

அவர்களுக்கென்ன அவர்களுக்கான கதை

சின்னத்திரையில் தொடர்ந்து ஓடியபடி இருக்கிறது

*****