மனதை வரைதல்
பென்சில் கொண்டுப் போய் வைத்தார்களா
என்ன
தாளைத் தானே தேடிக் கொண்டது
அம்மையின் குங்குமத்திலும்
இருக்கின்ற இலைகளிலும் பூக்களிலும்
நிறங்களைப் பிழிந்து கொள்கிறது
கைவிரல்கள் களிநர்த்தனம் புரிகிறது
சிறிய மனிதர்கள் பெரிய மனிதர்கள்
பொம்மைகள் பூனைகள் ஆடுகள் நாய்கள்
என்று வரைந்து தள்ளுகிறாள்
விருப்பப்படி இருக்கின்ற நிறத்தைக்
கொடுக்கிறாள்
மனிதர்கள் நீலமாகவும்
பொம்மைகள் வெளிர் சிவப்பிலும்
பூனைகள் பச்சை நிறத்திலும்
ஆடுகள் சிவப்பு நிறத்திலும்
நாய்கள் ஊதா நிறத்திலும் உலவுகின்றன
ஒவ்வொரு படத்தையும் உற்றுநோக்கும் போது
எந்தப் படத்திற்கும் காதுகள் இல்லை
யாரும் யாருக்கும் எதையும் சொல்ல வேண்டியதில்லை
என்பதைச் சொல்கிறாளோ என்னவோ
யாரும் சொல்லாமல் படங்களை வரைகிறாள்
எது இருக்க வேண்டும் எது இருக்க வேண்டாம்
என்பதை அவளே தீர்மானிக்கிறார்கள்
பென்சிலும் தாளும் நாம் கொடுத்தால்
ஓவியங்களை வரைபவள்
அவளாக வரையும் போது மனதை வரைகிறாள்
*****
No comments:
Post a Comment