மாடுகளும் நரியும்

நம் மாடுகள்

நம் மாடுகளுக்கு

சுவரொட்டிகளைத் தவிர

தர என்ன இருக்கிறது

சாக்கடையைக் குடித்துக் கொள்கின்றன

குழாயில் ஒழுகும் நீரை

சைடிஸைப் போல நக்கிக் கொள்கின்றன

வயிற்றில் நான்கு கிலோவுக்குக் குறையாமல்

பாலிதீன்கனை வைத்திருக்கின்றன

பார்ப்பவர்கள் விரட்டி விடும் போதெல்லாம்

பரிதாபமாகப் பார்க்கும் மாட்டின் பால்

காலையும் மாலையும் தேவையாக இருக்கிறது

கறந்த பின் வழக்கம் போல

விரட்டியடிக்கப்படுகின்றன மாடுகள்

*****

ஒரு நரிக்கு தெரியும்!

ஒரு நரிக்கு தான் நரியென்று தெரியாது

ஒரு புலிக்கு தான் புலியென்று தெரியாது

ஒரு பாம்பிற்கு தான் பாம்பென்று தெரியாது

ஒரு பூரானுக்கு தான் பூரான் என்று தெரியாது

ஒரு தேளுக்கு தான் தேள் என்று தெரியாது

ஒரு விசப் பூச்சிக்கு தான் விசப் பூச்சியென்று தெரியாது

ஒரு மனிதனுக்கு தான் நரியென்று தெரியும்

ஒரு மனிதனுக்கு தான் புலியென்று தெரியும்

ஒரு மனிதனுக்கு தான் பாம்பென்று தெரியும்

ஒரு மனிதனுக்கு தான் பூரான் என்று தெரியும்

ஒரு மனிதனுக்கு தான் தேள் என்று தெரியும்

ஒரு மனிதனுக்கு தான் விசப் பூச்சியென்று தெரியும்

ஒரு மனிதனுக்கு தான் மனிதன் என்று மட்டும் தெரியாது

*****