ஓடும் சாலைகளும் ஓடாத நீச்சல் குளமும்

வேக வேகமாக ஓடும் சாலைகள்

மெதுவாக நடந்த கால்களுக்கு பூமி புலப்பட்டது

சைக்கிள் சக்கரங்களில் சுழல ஆரம்பித்த போது

மரங்களும் தெருவோரமும் நடந்து வந்தன

இரு சக்கர வாகனம் ஒன்றில் விரைந்த போது

சாலைகள் ஓடி வரத் தொடங்கின

வேகமெடுக்கத் தொடங்கிய ஊர்திகளில்

கடக்க ஆரம்பித்த போது

மங்கலாய் கண்களுக்குள் அசைய ஆரம்பித்தன

பறத்தலின் சாத்தியத்தில் இருந்த போது

கொஞ்சம் கொஞ்சமாய் மறைய ஆரம்பித்தன

வேக சுழற்சி பார்வைக்குப் புலனாகாது

மனிதர்கள் அங்கே இருக்கிறார்கள்

ஒருவருக்கு ஒருவர் புலனாகாமல்

சாலைகள் வேக வேகமாக ஓடிக் கொண்டிருக்கின்றன

*****

நீச்சல் குளம்

இங்கே இருந்த

அம்மாம் பெரிய குளத்தின் மேல் இருக்கிறது

நான்கு பெரும் அடுக்குமாடி கட்டடங்கள்

நடுவில் ஒரு சிறு நீச்சல் குளம்

*****