அரியதொரு நிகழ்வு

அரியதொரு நிகழ்வு

வாழ்க்கையின் ஒட்டுமொத்த வெறுப்பையும்

உமிழும் கணங்கள் வாய்க்கும் போது

தேவ கணங்கள் சிதறுகின்றன

சாத்தானின் கரங்கள் நீள்கின்றன

வந்து விழும் நாசகாரச் சொற்களில்

கோபம் தணிகிறது

தணிய வைத்த நாசகாரச் சொற்களிலிருந்து

சங்கிலித்தொடர் வெறுப்பு புறப்படுகிறது

மனதின் ஒட்டு மொத்த வன்மத்தையும்

சுமந்து செல்லும் ரயிலென ஆகி

தடம் புரளும் வன்மங்கள் அபூர்வமாக

தண்டவாளத்தில் முளைவிடும்

அன்புச் செடியிலிருந்து அரிதாக நிகழலாம்

அரிதுதான் எனினும் அரிதுக்காகக்

காத்திருக்கிறது பூவுலகு

*****