தப்பித்தல் முட்டாள்தனம்

தப்பித்தல் முட்டாள்தனம்

வாழப் பழகிக் கொண்ட

குருவிகளுக்கு டார்வின் மேல் கோபம்

அவைகளுக்கு றெக்கைகள் இல்லை

தத்தித் தத்தி நடைபயில

கால்கள் இல்லை

எங்கே தப்பி விடுமோ என்ற சந்தேகத்தில்

கத்தரிக்கப்பட்டு இருந்தன

முன்பொரு காலத்தில் நீங்கள்

இருந்த இடத்திற்கு காடென்று பெயர்

இப்போதொரு காலத்தில்

இருக்கும் இடத்திற்கு கூண்டு என்று பெயர்

உச்சரிக்கப்படும் வாக்கியங்களை

வெறுக்கின்றன குருவிகள்

முடமாக்கப்பட்ட வாழ்வில்

தப்பித்தல் முட்டாள்தனம் என்பதை

உணர்ந்திருக்கின்றன அவைகள்

கூண்டுக் கம்பிகளைப் பார்த்து

நக்கலாய்ச் சிரிக்கின்றன

குருவிகள் மகிழ்வதாகப்

பார்த்து ரசிக்கிறார்கள் மனிதர்கள்

*****