வன்புணர்ச்சியாளர்களுக்கு மனதார நன்றி

வன்புணர்ச்சியாளர்களுக்கு மனதார நன்றி

அந்த வன்புணர்ச்சிக்குப் பின்

டிராகுலாக்களை நேசிக்கத் தொடங்கி விட்டாள்

மென்மைக்கு உவமிக்கப்பட்ட அவள்

மனம் முழுதும் இருளின் கோரப் பிசாசுகள்

தன்னோடு சிநேகம் பாராட்டுவதாக சொல்கிறாள்

கத்திகளை ஸ்பூன் போல் உபயோகித்து

சாப்பிட பழகி விட்டதாக

அன்றாட நிகழ்வுகளைப் பகிர்ந்து கொள்கிறாள்

இந்த மிருகங்களுக்காகத்தான்

இருக்கிறது போலும்

மிருக வதைத் தடுப்புச் சட்டம் என்று

அடிக்கடி சத்தம் போட்டுச் சிரித்துக் கொள்கிறாள்

கருணையற்ற நீதிமன்றங்களின்

குறுக்கு விசாரணையில் நிகழ்ந்த

வார்த்தைகளின் வன்புணர்ச்சிக்குப் பின்

கூண்டில் நின்ற வன்புணர்ச்சியாளர்களை

கருணையோடு பார்த்த அவள்

இவ்வளவு நீண்ட நேரம் வன்புணர்ச்சி செய்யாத

அவர்களுக்கு மனதார நன்றி சொல்லிக் கொண்டாள்.

*****