மாபெரும் சகிப்புத் தன்மை

மாபெரும் சகிப்புத் தன்மை

உன் காதல் என்னை விரும்பச் செய்யும்

நான் சுயநலமுள்ள மனித மிருகம் என்று

தெரிந்த பின்னும்.

டாஸ்மாக் வெறியனாகி

வேளைதோறும் குடிப்பதும்

குடிகாரனின் ஆணவத்தோடு

உன்னை அடிப்பதும்

அன்றாட நிகழ்வுகள் ஆன பின்னும்

என்றோ ஒரு நாள் திருந்து விடுவேன்

என்ற நம்பிக்கை

என்னை உன்னில் ஏற்கச் செய்யும்.

மனைவியென்ற உரிமையில்

வன்புணர்ச்சி செய்த நாட்களிலும்

உன் அன்பு என்னை திக்குமுக்காடச் செய்யும்.

பொறுமைக்கென்றே பிறந்தவளான நீ

அடிக்கடிச் சொல்லிக் கொள்கிறாய்

ஒரு சுமங்கலியின் ஆசை துறந்து

"நான் முந்தி போய்ட்டா

அவருக்கு அடிப்பதற்குக் கூட ஆளிருக்காது!"

அந்த அக்கறையில் நீ காட்டுவதெல்லாம்

ஒட்டு மொத்த டாஸ்மாக்குகளையும்

ஒரு புருஷ மிருகத்தையும்

பொறுத்துக் கொண்ட மாபெரும் சகிப்புத் தன்மை.

*****