மாபெரும் வணக்கம்

மாபெரும் வணக்கம்

எழுநூறு ரூவா சிலிண்டர்க்கும்

பத்து ரூவா கொடுத்து வாங்கும்

நூறு மில்லி மண்ணெண்ணெய்க்கும்

வக்கில்லாத போது

சீமைக் கருவேல முள்ளே

விலையில்லா விறகாயிருந்தது.

நிலத்தடி நீர் மட்டத்தை உறிஞ்சும்

சீமைக் கருவேல மரங்களைப்

பிடுங்கிப் போடும் ஊருக்குள்

ஆழ்துளை கிணறு போட்டு

நீர் உறிஞ்சும் ராட்சச எந்திரங்கள்,

மீத்தேன் என்றும் ஹைட்ரோ கார்பன் என்றும்

உறிஞ்சித் தள்ளும் குழாய்களின் வேர்கள்

இருப்பது தெரிந்தும்

நாம் எதைப் பிடுங்க வேண்டும் என்று

அவர்கள் முடிவு செய்ய

இப்போதைக்கு அவர்கள் சொன்னபடி

உதட்டுக்கு மேல் இருக்கும்

அவரவர் முடிகளை அவரவர்கள்

பிடுங்கிக் கொண்டே

நட்ட மரங்களுக்கு ஊற்ற

நீரில்லாத சோகத்தில்

நீருற்ற தேவையில்லாத

மரங்களையும் பிடுங்கி எறிந்து விட்டு

அவர்களுக்கு ஒரு மாபெரும் வணக்கம் வைப்போம்

மைக்ரோ வேவ் அவனிலும்

மின் அடுப்பிலும்

யூனிட்டுக்கு நூறு ரூபாய் கொடுத்து

கஞ்சி சமைக்கலாம் என்ற வாக்குறுதியை ஏற்றுக் கொண்டு.

*****