செஞ்சிடுங்க...

செஞ்சிடுங்க...

அறுபத்தாறு கோடி ஊழல்

ஆயிரம் கோடி ஊழல்

வருமானத்து அதிகமான சொத்து

அதிகார துஷ்பிரயோகம்

இதெல்லாம் குற்றம் என்று

யாரும் பார்ப்பதில்லை

அதுவுமன்றி,

இவைகளைக் குற்றமென்று நிரூபிக்க

நான்கு நீதிமன்றங்கள் கடந்தாக வேண்டும்

இப்படி அவர்கள் செய்வதையெல்லாம்

வேண்டா வெறுப்பாகவேனும்

விரும்பச் செய்திடவே

படைக்கப்பட்டுள்ளோம் மக்களென.

மதுவாங்கட்டையில் அமர்ந்து

தன் வாரிசுகளுக்கெல்லாம்

லஞ்சம் கொடுத்து வேலை வாங்கிய

முத்துக்கண்ணு சொல்லும் போது

வேடிக்கையாக இருக்கும்,

"தேர்தல் நேரத்துல

ஆயிரம், ஐநூறுன்னு கொடுக்கணும்னா

அவன்தான் எங்கப் போவான்?

அடிக்கணும்! இன்னும் அடிக்கணும்!

அப்பத்தான்

ரெண்டாயிரம், ஐயாயிரம்னு

கைநிறைய கொடுப்பானுங்க"

*****