சிறைவாசி இயந்திரங்கள்

சிறைவாசி இயந்திரங்கள்

காற்று நுழையும் சன்னல்கள் இல்லாத வீடுகள்

குளிர்சாதன வசதிகளின் குளுமையில்

நச்சுக் காற்றை வெளியேற்றிக் கொண்டிருக்கின்றன

குப்பைகள் உரமாகும் குப்பைக் குழிகள் இல்லாத வீடுகள்

வீதியோரக் குப்பைத் தொட்டிகளில்

பாலிதீன்களையும் பிளாஸ்டிகளையும் நிரப்பிக் கொண்டிருக்கின்றன

ஆடு மாடுகளின் சத்தங்கள் இல்லாத வீடுகள்

பாக்கெட் பாலைப் பருகியபடி

தொலைக்காட்சி சத்தங்களைக் கசிய விடுகின்றன

அமர்ந்து பேசும் திண்ணைகள் இல்லாத வீடுகள்

முன்வாசலில் வணிக வளாகங்களை பரப்பி வைத்து

பேரம் பேசிக் கொண்டிருக்கின்றன

வீடுகள் ரொம்ப மாறி விட்டன என

சலித்துக் கொள்ள கூட நேரமில்லாது

கூடு அடைவதும் தொலைவதும் என்று

செக்கில் ஆடிக் கொண்டிருக்கிறார்கள்

இயந்திரங்கள் ஆகி விட்ட வீட்டுச் சிறைவாசிகள்

*****