பழைமையில் புதுமையைக் கடத்தல்

பழைமையில் புதுமையைக் கடத்தல்

ஒரு முறை உன் உள்ளாடைக் கிழிசல் பரவசப்படுத்தியது

ஒரு முறை உன் அரை நிர்வாணம் சிலிர்க்க வைத்தது

உதட்டுச் சுழிப்புக் கூட ஒரு நேரத்தில்

உன்மத்தத்தை அதிகம் செய்தது

ஒரு நாள் ஒரு துளிக் கண்ணீர்

உன் மேலான மையலை மெருகேற்றியது

உண்பதற்கு ஒரு பருக்கை இல்லாத நாளில்

ஆரத் தழுவி உறைந்து போனது நிகழ்ந்தது

இப்போது எல்லாம் இருக்கிறது

உள்ளாடைகளிலிருந்து உண்ணும் தட்டிலிருந்து

பேழை நிறைய ஆபரணங்கள் வரை

மையலைத் தூண்ட ஏதுமில்லாத

மாளிகையில் நீயும் நானும்

உண்டு உண்டு உறங்குகிறோம்

உறங்கி உறங்கி உண்கிறோம்

நம்மை ஆதர்ஷ தம்பதிகளாய்ப்

பலர் நினைத்துக் கொள்கிறார்கள்

ஆதர்ஷமாய்த் தழுவிய பழைய நாட்களை

வைத்துக் கொண்டு

புதிய நாட்களை கடந்து கொண்டிருக்கிறோம்

*****