பேருந்தில் சந்திப்போம்

பேருந்தில் சந்திப்போம்

கடந்த நான்கு வருடங்களாய்

பேருந்தில் பார்த்துக் கொள்கிறோம்

வீட்டில் வந்து பார்ப்பதை விட

எவ்வளவு வசதி இதில்

என்னைத் தேடி நீ வர வேண்டியதில்லை

உன்னைத் தேடி நான் வர வேண்டியதில்லை

இருவரும் பேருந்தைத் தேடி வந்தால் போதும்

பேருந்து இருவரையும் பார்க்க வைத்து விடும்

இருவருக்கும் பாஸ் இருப்பதால்

உனக்கு நானும் எனக்கு நீயும்

டிக்கெட் எடுக்க வேண்டியதில்லை

எவ்வளவு சௌகரியம் செய்கிறது இந்தப் பேருந்து

இன்றென்ன தயிர் சாதமா

நீங்களென்ன புளி சாதமா என்று

விசாரித்துக் கொள்விதல் எவ்வளவு ஆனந்தம்

பிறகு நீயும் அலுவலகம் சென்று விடுகிறாய்

நானும் அலுவலகம் சென்று விடுகிறேன்

பத்திரமாக வந்து விட்டதாக உன் வீட்டார்க்கு

தொலை பேசுகிறாய்

பத்திரமாக வந்து விட்டதாக என் வீட்டார்க்கு

நானும் தொலை பேசுகிறேன்

சாயுங்காலம் வீடு திரும்புகையில்

கேண்டினில் நீ சாப்பிட்ட சமோசா பற்றிச் சொல்கிறாய்

நான் தயிர் வடை சாப்பிட்டதைச் சொல்கிறேன்

மறுநாள் இருவரும் பேருந்தில் சந்தித்தால்

புரிந்து கொள்கிறேன்

வீட்டிலிருந்து பத்திரமாக நீ பேருந்து ஏறுகிறாய்

நானும்தான்

*****