வருடா வருடம் பிறந்த நாள்

வருடா வருடம் பிறந்த நாள்

திடீரெனப் பிறந்த நாள் என்கிறாய்

வெறும் வாழ்த்துகளை மட்டும் எப்படிச் சொல்வது

பத்து இருபது பலூன்களை உடைத்தாக வேண்டும்

முகத்தில் பூச கேக் வாங்க வேண்டும்

வருவோர் தலையில் கொட்டி அனுப்புவதற்கு

ஜிகினா தாள்களை வெட்டிச்  சேர்க்க வேண்டும்

பழைய சோப்பு டப்பாக்களை

கிப்டாக வாங்கி வருவோர்க்கு

மீந்து கிடக்கும் சேமியாவில் கிச்சடியும்

பாதித் துருவி பாதி துருவாமல் கிடக்கும்

தேங்காயில் சட்டினியில் செய்தாக வேண்டும்

கேட்காமலேயே புத்தாடை வாங்கியிருப்பாய்

சல்லிசாகவாவது சாக்லேட் வாங்க மறந்திருப்பாய்

இந்த இரவு முழுவதும் விழித்திருக்க வேண்டும்

நள்ளிரவில் பிறந்தேன் என்பாய்

நீயே பார்

வருடத்திற்கு ஒரு முறை இப்படி செய்தாக வேண்டியிருக்கிறது

வருவோர் போவோரிடம்

உன் முப்பத்து இரண்டாவது பிறந்த நாளை

இருபத்து மூன்று என்று வேறு சொல்ல வேண்டியிருக்கிறது

*****