தேவமலரின் ரகசியம்

தேவமலரின் ரகசியம்

ஒரு தேவமலரின் ரகசியம் ஒளிந்திருக்கிறது உன்னிடம்

தேவ மலரின் ரகசியம் பற்றிச் சொல்ல வேண்டுமென்றால்

வண்ணத்துப் பூச்சியைச் சிறகடிக்க வைக்கிறது

புல்லி வட்டத்தைப் பசுமையாக்கி

அல்லி வட்டத்தில் வண்ணத்தைத் தூவி இறைக்கிறது

ஆண் மலரா பெண் மலரா இரண்டும் கலந்ததா

இரண்டும் இல்லாததா என்பதைத் தீர்மானிக்கிறது

காயாகிக் கனிந்து விதையாகும் பூவினின்று

ஆயிரம் லட்சம் கோடி பூக்கள் பிரசவிக்கின்றன

பறித்துத் தலையில் சூடும்

அடிமையாக்கப்பட்ட ஒரு மலரினின்று

ரகசியம் சருகாகி உதிர்ந்து காலில் மிதிபடுகிறது

நீ அறியாத ரகசியப் புத்தகம் ஒன்றில்

அழகான மலர்கள் பறிக்கப்பட்டு அழிக்கப்படும் என்ற

தேவ ரசியம் பொறிக்கப்பட்டு இருக்கிறது என்பதை

அறியச் சொல்ல வந்தவரை நோக்கி

அதனாலென்ன மலர்தலும் பறித்தலும்

நின்று விடவாப் போகிறது எனப் புன்னகைக்கிறாய்

தேவ மலரின் ரகசியத்தை ஊரறியச் செய்வதைப் போல நீ

*****