சபிக்கும் முன் மன்னியுங்கள்

சபிக்கும் முன் மன்னியுங்கள்

உப்பு பொம்மையை நீரில் குளிப்பாட்டுகிறார்கள்

கரைந்து விடும் என்ற கதறலைப் பொருட்படுத்தாமல்

ஊற்றும் நீரைப் பிரவாகமாய்ப் பெருக வைக்கிறார்கள்

மாவு பொம்மைக்கு வியர்க்கும் என்று காற்றில் வைக்கிறார்கள்

மறைந்து விடும் என்ற கேவலைப் பொருட்படுத்தாமல்

காற்றின் வேகத்தை அதிகபடுத்துகிறார்கள்

நீராட்டலும் காற்றோட்டமும் நல்லதுதானே என்கிறார்கள்

தண்ணீரில் இருக்கும் மீனுக்குத்

தரையில் மாளிகைக் கட்டித் தருவதில்

என்ன பிழை இருக்கிறது என்கிறார்கள்

வெற்றிடத்தில் ஓசை பரவுமா என்கிறார்கள்

பிழையென்ன இருக்கிறது திராவகம் படும் போது குளிரும் என்றால்

அழிந்த பின் எல்லாம் ஒன்றே

அழிவதற்கு முன் வேறுபட்டிருக்க வேண்டியதாக இருக்கிறதன்றே

உப்பு பொம்மையை நீரினின்று விலக்கி

விலக்கிய நீரில் மீனை விடுங்கள்

காற்றினின்று மாவு பொம்மையை விலக்கி

காற்றினூடே ஒலிக்கும் உண்மைகளைக் கேளுங்கள்

கடைசியாக அறிவுரையில் முடிந்த கவிதைக்காக

எழுதியவனைச் சபிக்கும் முன் மன்னியுங்கள்

*****