நியூ ஏஜ் பொயட்ரிஸ்

மனத்தின் அமிலம்

உங்களுக்குப் பிடித்த

பிச்சைக்காரனுக்கே பிச்சையிடுவீர்கள்

உங்களைக் கவர்ந்த

பைத்தியகாரனுக்கே பரிதாபம்‍ கொள்வீர்கள்

உங்களுக்கு அனுகூலமான

சாதிகாரனுக்கே தோள் கொடுப்பீர்கள்

உங்களுக்கு ஒத்தாசையான

பக்கத்து வீட்டுக்காரனுக்கே

பலகாரங்கள் அனுப்புவீர்கள்

உங்களுக்குக் காரியம் ஆகுமென்றால்

குற்றங்களுக்கும் வக்காலத்து வாங்குவீர்கள்

உங்கள் கருத்தின் படி

நாட்டில் எதுவும் நடக்கவில்லை என்கிறீர்களே

நீங்கள் ஆதரிப்பவர்

நாட்டை ஆளவில்லை என்கிறீர்களே

உங்களுக்குப் பிடித்தமான

பிச்சைக்காரர்களும், பைத்தியக்காரர்களும்

நிரம்பிய நாடாக்குவதில்

உங்களுக்குப் பிடித்தமற்றவர்களின்

வாழ்விடங்களைச் சுடுகாடாக்குவதில்

உங்களுக்குதான் எவ்வளவு ஆர்வம்

எதையும் அரிக்கும் அமிலம்

உங்களையும் அரிக்கும் என்பது அறியாமல்

*****