சாத்தானின் பிரார்த்தனை

சாத்தானின் பிரார்த்தனை

அவரவர் மனதில் அடைத்து வைத்திருக்கும்

சாத்தானை அவிழ்த்து விடுங்கள்

அவன் விடுதலை வேண்டி பிரார்த்திக்கிறான்

அடைத்து வைப்பது கொடுமையானது என

அவன் வாதிடுகிறான்

தப்பி விடும் சாத்தானோ

விடுதலை அடையும் சாத்தானோ

எதுவும் செய்ய முடியாது

குற்றச் செயல்களுக்கான வாய்ப்புகள் இல்லாத போது

என்ற போதும்

சாத்தானை அடைத்து வைப்பதில்

சாமர்த்தியம் பேசுகிறோம்

குற்றச் செயல்களுக்கான வாய்ப்புகள்

பெருகிக் கொண்டிருக்கின்றன

சாத்தான் மீண்டும் மீண்டும்

மனதுக்குள் அடைந்து கிடக்கிறான்

உடைக்க முடியாத அளவுக்கு

சிறைச்சாலைகள் பலமானவையல்ல என்பதை

சாத்தான் உணரத் தொடங்கும் போது

பூட்டுகளின் சாவிகளுக்காக

அவன் கெஞ்சிக் கொண்டிருக்க மாட்டான்

அன்பானக் கரங்கள் தழுவிக் கொள்ளும் போது

தேவனின் கரங்களில் குழந்தையாகவும்

அவன் தயங்க மாட்டான்

*****