மேலும் பல சிந்தனைகள்
காலத்திற்கு ஏற்ப புதிய மொழியில் சிந்தனைகள்
வளர்ச்சி பெறவில்லை என்பது எஸ்.கே.யின் தாழ்மையான எண்ணம்.
ஆகவே எஸ்.கே....
என்ன என்கிறீர்களா?
நீங்களே கீழே மேற்கொண்டு படித்துப்
பாருங்கள்...
களவைப் பொருத்த வரை... செய்! மீண்டும்
மீண்டும் செய்! அப்போதுதான் நிறைய உண்மைகள் புலப்படும். களவாடப்பட வேண்டியது சட்டைப்
பைகளில், கைப் பைகளில் இல்லை, பெட்டிகளில் உள்ளன என்பது புலப்படும்.
*****
மனம் கொஞ்சம் விரைவாகத்தான் செல்லும்.
சாலையின் வேக எல்லை (ஸ்பீடு லிமிட்) அதுக்குப் புரியாது. நாம் வாகனம் வேகமாகச் செல்வதாக
(பொய் அல்லது மெய்) சொல்லுவோம்.
*****
விரைவுபடுத்துவதுதான் எல்லாவற்றிலும் பிரச்சனை.
எல்.கே.ஜி. முடித்த அடுத்த ஆண்டிலே டாக்டரேட் கிடைத்தால் நல்லதுதான். கொடுக்க மாட்டேன்கிறார்களே
என்பது நமது கவலை. டாக்டரேட்டை முடித்த அடுத்த ஆண்டிலே முறைப்படி யு.கே.ஜி. படிக்க
நேர்மையாக வந்து விடும் நல்லவன் நாம் என்பது அவர்களுக்குத் தெரியாது மற்றும் புரியாது.
ஆகவே பொறுமையாகப் படித்துக் கொண்டு செல்வதுதான் நல்லது. எல்லாம் தானாகவே நிறைவேறும்.
பணத்தை மட்டும் தயார் செய்து வைத்துக் கொள்ள வேண்டும் என்பதில் குறியாக இருக்க வேண்டும்,
ஆமாம்!
*****
தேவையற்ற ஒன்றைச் செய்து கொண்டிருந்தால்
எல்லாரது கோபத்திற்கும் ஆளாவாய். ஆக, தேவையான ஒன்றை இன்றிலிருந்து செய். எல்லார் மீதும்
கோபப்படு(ம்). யாரும் உன் மீது கோபப்பட மாட்டார்கள். அவன் அப்படித்தான் நாய் மாதிரி
வள் வள் என்று எரிந்து விழுவான் என்று விட்டு விடுவார்கள்.
*****
எங்கே நிறைவேறாமல்
போய் விடுமோ என்ற அச்சமும், ஐயமும்தான் உன்னை விரைவுபடுத்துகிறது. அதற்கு முன் அதாவது
இந்த நிலைக்கு முன் நீ மகிழ்ச்சியாக இருந்திருந்தால் எதையும் நிறைவேற்ற முயற்சி எடுக்காமல்
இருப்பது சிறப்பு. ஏன் என்பாய்? நீ குறுக்குவழிக்காரன். ஆதலால் நீ அப்படியே இருப்பது
வெகு சிறப்பு.
*****
No comments:
Post a Comment