மீண்டும் காதலியைக் கண்டவன்
இன்னொருவனுடன் சல்லாபிக்கும் காதலியைப் பார்த்த
பின்
காதலின் நம்பிக்கையை இழந்தவன்
நெடுநாட்கள் அலைந்து திரிந்தான்
ஆணும் பெண்ணுமாய் அலைபவர்களை
அற்பமாய்ப் பார்த்து பைத்தியம் போல் சிரித்தான்
புணரும் நாய்களைப் பூனைகளைக் கண்டால்
வெறிகொண்டு அடிக்கத் துவங்கினான்
உலகம் தனித்திருக்க கடவது எனச் சபித்தான்
நிலை திரிந்து அலைந்தவனை இழுத்து வந்து
ஒரு பெண்ணைப் பார்த்து மணம் புரிந்து வைத்ததை
எந்த வித எதிர்ப்புமின்றி ஏற்றுக் கொண்டான்
ஒரு நொடியில் திருந்திய உலகைப் போல
மாறிப் போனவனின் உலகில் அதிசயங்கள் முளைத்தன
குடும்பஸ்தன் நியாயஸ்தன் பெரியஸ்தன் ஆகி
அலுவல் பணியின் அழுத்தத்தின் ஒரு நாள்
இன்னொருத்தியுடன் சல்லாபித்த போது
முன்பொரு நாள் எதேச்சையாக
இன்னொருவனுடன் சல்லாபித்த காதலியைக் கண்டான்
*****
No comments:
Post a Comment