கனவுத் துறையின் காதல் விளக்கம்

கனவுத் துறையின் காதல் விளக்கம்

இந்த இரவு பிடித்திருந்தால்

கனவில் மட்டும் வா

ஏழு கடல் ஏழு மலை

எட்டு காடு எண்பது பள்ளதாக்கு

கொடும் மிருகம் கடும் மழை

உறைய வைக்கும் பனி கொளுத்தும் வெயில்

ஆறலைக் கள்வர்கள் நிறைந்த பாலை

தடுத்து நிறுத்தும் சடங்குகள்

கட்டிப் போடும் சம்பிரதாயங்கள்

சாதித் தலைவர் ஊர் நாட்டாமை

ஆணவக் கொலை புரிய அஞ்சாத உறவுகள்

குலப்பெருமையின் வீச்சமடிக்கும் இளவட்டங்கள்

ஊளையிடும் நாய்கள் இரவுக் காவல் புரியும் கூர்க்கா

எதையும் பொருட்படுத்தாத கனவு பிடித்திருக்கிறது

நாம் காதல் செய்வதும் களவு புரிவதும்

வண்ணத்துப் பூச்சிக்கும் தெரியலாகாது

தூது செல்லும் மின்னஞ்சலிலும் வாட்ஸ் ஆப்பிலும்

தகவல்கள் தந்திரமாய் உருவப்படுகின்றன

நம்மிருவர் கனவுகளை நாமிருவரும்

பத்திரமாய் வைத்திருக்கும் வரையில்

கனவுகளிலாவது காதலிக்க நாமிருப்போம்

*****