ஆதி மரபின் பின்தொடரும் அச்சம்

ஆதி மரபின் பின்தொடரும் அச்சம்

மனிதர்கள்தாம்

காட்டு விலங்குகள் அல்ல

அதிகாரங்களைக் காட்டி பயமுறுத்துவார்கள்

கூட்டம் சேர்த்து வைத்திருக்கும்

ஆட்களை முன்னிருத்தி மிரட்டுவார்கள்

ஆதியில் பரவிய

காட்டு வாழ்வின் அச்சம் பின்தொடரும் போது

அடிமைக் குகையில் அவ்வபோது ஒளிந்து கொள்ள வேண்டும்

வெறி பிடித்த மனிதர்களின் கண்ணில் படும் போது

மருண்டோடும் மானின் வேகத்தில் ஓட வேண்டும்

கொடிய காட்டு மிருகங்களைப் போலத் துரத்துபவர்கள்

மனதின் நம்பிக்கையை ருசித்துத் தின்னக் கூடியவர்கள்

சிங்கமும் புலியுமாய் உருமிக் கொண்டிருப்பவர்கள்

மனித வேட்டையாடித் தின்ன உரிமம் பெற்றவர்கள்

முயலும் மானுமாய்ப் பழக்கப்பட்டவர்கள்

ஒளிந்தோடி வாழ அனுமதிக்கப்பட்டவர்கள்

பிராய்லர் கோழிகளும் வளர்ப்பு ஆடுகளுமாய்

கணக்கில் கொள்ளப்படுபவர்கள்

எப்போது வேண்டுமானாலும் துண்டாடப்படுபவர்கள்

ஆதி மரபின் காட்டு வாழ்வின் மிருக அச்சம்

நாகரிக தொட்டிலில் மனித வடிவில் பின் தொடரும் நிழலைப் போல

******