ஆதி நிலத்தில் தெய்வங்களாய் இருந்தவர்கள்

ஆதி நிலத்தில் தெய்வங்களாய் இருந்தவர்கள்

நீங்கள் வந்து சேராத போது

சுதந்திரமாகச் சுற்றித் திரிந்தோம்

எந்த விதிகளுக்கும் கட்டுப்படாமல் அலைந்தோம்

எந்த சிக்னல் விளக்கும்

எங்கும் எங்களைத் தடுத்து நிறுத்தவில்லை

எங்கள் நிலங்களுக்கு விலையேதும் இல்லை

விரும்பிய இடத்தில் அவரவர் இருந்தோம்

விரும்பாத இடத்தில் விலங்குகள் இருந்தன

யாரும் நட்டு வளர்க்காமல் மரங்கள் நிறைந்திருந்தன

பறவைகள் எங்கள் வானல் பறந்து சென்றன

நீங்கள் வந்தீர்கள் ஒருவர் பின் ஒருவராக

எங்கள் இடத்தை முதலில் நகரம் என்றீர்

பிறகு மாநகரம் என்றீர்

ஒவ்வொரு அங்குல நிலத்துக்கும் விலை பேசி

எங்கள் நிலம் முழுதையும் ஆக்கிரமித்து

எங்களைச் சாலையோரம் தள்ளினீர்கள்

எங்கள் நிலத்தில் எங்களுக்கு இல்லாத உரிமை

உங்களுக்கு வந்ததாகப் பிரகடனம் செய்கிறீர்கள்

உங்கள் நிலமான பின் ஓரமாகச் செல்லும்

எங்கள் நாய் அடிபட்டுச் சாகிறது

குடி போதையோடு வரும் உங்கள் வாகனம்

எங்கள் மேல் ஏறிச் செல்கிறது

அணில் பிள்ளைகள் விவரம் புரியாமல்

உங்கள் மின் கம்பிகளில் கருகுகின்றன

நீங்கள் கட்டியிருக்கும் அதி நவீன உணவகங்கள் முன்

எங்கள் பிள்ளைகள் பிச்சைத் தட்டு ஏந்தி நிற்கிறார்கள்

நாகரிகமாக வாழ கல்வி கற்க வேண்டும் என்கிறீர்கள்

நாகரிகமின்றிச் செத்த எங்கள் முன்னோர்களை நினைந்து

நாங்கள் விடாது பெய்யும் அடைமழையென அழுகிறோம்

வீடில்லாத எங்களை ஒரு நாள் கைது செய்து

வீடு போன்றிருக்கும் சிறையில் அடைக்கிறீர்கள்

வீடு கிடைத்த மகிழ்ச்சியில் இருக்கும் போது

சிறையிலிருந்து அடித்துத் துரத்துகிறீர்கள்

நீங்கள் பறித்துக் கொண்ட எங்கள் நிலத்தில்

உங்களுக்கான சட்டங்களை அமல் படுத்துகிறீர்கள்

நாங்கள் உயிரைக் கையில் பிடித்துக் கொண்டு

உங்கள் சட்டத்தின் முன் அடிபணிந்து

அடிமை போல வாழ சம்மதிக்கிறோம்

எங்கள் மேல் கரிசனம் காட்டுவதாய்

உங்களில் சிலரைச் சேவகராய் அனுப்பி வைக்கிறீர்கள்

அவர்களை நாங்கள் ரட்சகராய் வழிபடுகிறோம்

ஆதி நிலத்தில் நாங்கள் தெய்வங்களாய் இருந்ததை மறந்து விட்டு

*****