ஒவ்வொரு நாளும் வளர்ந்த மரம்

ஒவ்வொரு நாளும் வளர்ந்த மரம்

இன்னொருவருக்குக் கிட்டும் அமைதி

உங்களுக்குக் கிட்டாமல் போகலாம்

நீங்கள் நினைக்கலாம்

மன அமைதி என்பது வஞ்சகமானது என்று

அது உங்கள் எண்ணங்களை வைத்து

உங்களை வாட்டக் கூடியது

நீங்கள் உருவாக்கிய உலகில் வைத்து

உங்களைச் சிறைபிடிக்கக் கூடியது

என்றோ ஒரு நாள் விதைத்த விதை

இன்று மரமாகியிருக்கிறது

ஒவ்வொரு நாளும் வளர்ந்த மரத்தை

நீங்கள் கவனிக்க தவறி விட்டீர்கள்

கொழுந்து விட்டெரிந்த பேராசையோ

அதன் புகைச்சலில் எழுந்த பொறாமையோ

உங்கள் கண்களை மறைத்திருக்கும்

எது எப்படி இருந்தாலும்

உங்கள் தேவை உங்களுக்குத் தெரிந்தே இருந்திருக்கும்

உங்கள் நிலையும் இருப்பும்

நீங்கள் அறிந்ததாகவே இருந்திருக்கும்

சரியானது எதுவென்பதும்

உங்கள் உணர்வில் தோன்றியிருக்கும்

எல்லாவற்றையும் நிராகரித்து

உங்கள் கண்களுக்குத் தெரிந்ததெல்லாம்

உங்களுக்கான சொகுசு மட்டுமே என்பதால்

இப்போது நீங்கள் தேடும் அமைதி

உங்கள் கண்களுக்குத் தட்டுபடாமல் போகிறது

இப்போதும் நீங்கள் கண்டடையலாம் என்றால்

உங்கள் பார்வையை மறைப்பவைகளை

நீங்கள்தான் தகர்த்தெறிய வேண்டும்

உங்கள் அமைதியை நீங்கள்தான் மூடியிருக்கிறீர்கள்

*****