அசையாத மனிதர்களைத் தாங்கும் நாற்காலிகள்

அசையாத மனிதர்களைத் தாங்கும் நாற்காலிகள்

முதலில் ஒரு மணி நேர அனுமதி கேட்கப்பட்டது

இரண்டு மணி நேரம் கடந்த போது

அது அரை நாள் விடுமுறையாகக் கோரப்பட்டது

இதே போல் பிற்பகலில் ஒரு மணி நேர அனுமதி கேட்கப்பட்டு

இரண்டு மணி நேரம் கடந்த பிற்பாடு

அது ஒரு நாள் விடுமுறையாக மாற்றப்பட்டது

கொஞ்சம் நெகிழ்ந்திருந்தால் சலுகையில் எல்லாம் நகர்ந்திருக்கும்

நெருக்கிப் பிடிக்கும் போது வேறு வழியின்றி

ஒழுங்கிற்குள் வர நினைக்கிறார்கள்

ஏமாற்றுவதற்கான அத்தனை வாய்ப்புகளையும்

செய்து பார்க்க நினைப்பவர்கள்

கதையாகாது என்று தெரிந்த பிறகே

சட்டதிட்டங்களுக்குள் வர நினைக்கிறார்கள்

வேலை செய்யாமலிருப்பதற்கு மூளையைப் பிரயோகிப்பவர்கள்

வேலை நாட்களை விடுமுறை நாட்களாக்கி

வார்த்தைகளை வெகு வஞ்சனையாக வீசுகிறார்கள்

வார்த்தைகளுக்கு மயங்குபவர்கள்

காரியங்கள் தொலைத்து போக

தேய்ந்து போய்க் கிடக்கும் நாற்காலிகளில்

பிட்டங்களின் சுவடுகளைக் காண்கிறார்கள்

காலம் காலமாய் அசைந்து கொடுக்காத

மனிதர்களைச் சுமந்த நாற்காலிகள்

களைத்துப் போய் கிடக்கின்றன

*****