சுவரை நனைக்கும் குருதி

சுவரை நனைக்கும் குருதி

எழுத்துகள் குற்ற உணர்வைத் தருகின்றன

இதுவரை வாழ்ந்த வாழ்க்கையைக் குறை கூறுகின்றன

எப்படி வாழ வேண்டும் என வரையறுக்கின்றன

நடைமுறை முரண்பாடுகள் எழுத்துகளுக்குத் தெரிவதில்லை

எழுத்துகள் பிறந்த பிறகு

நடைமுறையினின்றுப் பிறந்ததை எழுத்துகள் மறந்து விடுகின்றன

உணர்ச்சிவசப்படுத்தினால் போதும் என்று நினைக்கின்றன

வியப்பின் உச்சத்தில் நிறுத்துவது போதும் என்று கருதுகின்றன

மனித வியாபாரத்தின் மலினப் பொருளாவதைப் பற்றி

எழுத்துகள் அக்கறை காட்டுவதில்லை

பிழைத்திருப்பதற்கான அத்தனை சாத்தியங்களையும்

செய்து கொள்ளும் எழுத்துகள்

வாசிப்போருக்கு அச்சாத்தியம் கூடாதென்கின்றன

உறைந்து விட்ட ஒரு பொழுதைத்

தவறாகப் பிரதியெடுக்கும் எழுத்துகள்

பதிவாகி விட்ட காரணத்தைச் சொல்லி

நகலை அசலென்றும் அசலை போலியென்றும்

அதிகார மிரட்டல் செய்கின்றன

எழுத்துகளை எழுத்துகளால் எதிர்கொள்கையில்

வரலாற்றுச் சுவரை மனித குருதி நனைக்கிறது

இனிமேலாவது உண்மையை எழுதுங்கள் என்று எழுதப்படுவது

பூட்ஸ் கால்களின் அடியில் மிதிபடுகிறது

*****