காய்ச்சலில் கரையும் பொழுதுகள்

காய்ச்சலில் கரையும் பொழுதுகள்

உடல் காய்கிறது என்கிறார்கள்

எனக்கோ உள்ளுக்குள் உடல் குளிர்கிறது

பனிக்காட்டில் வெடவெடப்பது போல இருக்கிறது

போர்வைகளின் போதாமைகளில்

கிடைக்கும் துணிகள் அனைத்தும்

உடல் முழுதும் சுற்றிச் சூழ்ந்திருக்கின்றன

மோரும் தயிரும் வேண்டாம் என்கிறார்கள்

அவையன்றோ நாவுக்குச் சுவையாய் இருக்கின்றன

இனிக்கும் ஜிலேபி பித்தமேறிய நாக்கில்

பாகலைப் போலவே வேம்பைப் போலவோ

தாங்க முடியாத கசப்பின் பிரதேசத்தைக் கொணர்கிறது

சில நாள் குளியல் வேண்டாம் என்கிறார்கள்

குளியல் அன்றோ தாய்மடி போல ஆறுதல் தருகிறது

கொஞ்சம் வியர்த்தால் எல்லாம் சரியாகும் என்கிறார்கள்

உடலின் நீர் பாலைவனத் தண்ணீரைப் போல மறைந்து கிடக்கின்றது

தாங்க முடியாத உடல் வலியில் சுகம் இருப்பதாக

சொல்லப் போக மருத்துவரிடம் கொண்டு செல்வது நல்லது என்கிறார்கள்

அதற்குள் பூண்டையும் மிளகையும் பொடித்த

ரசத்தின் வாசனை வீடெங்கும் நிறைகிறது

காய்ச்சல் நிற்கும் வரை ஆலோசனைகள் நிற்காமல் பெருக்கெடுக்கின்றன

படுக்கையின் சுகம் காய்ச்சலில் அன்றோ புரிபடுகிறது என்றால்

உளறத் தொடங்கி விட்டான் என்று உஷாராகத் தொடங்குகிறார்கள்

மருத்துவமனைக்கு அழைத்துச் செல்லும் வாகனம் வரும் ஓசை

ஒலியின் டாப்ளர் விளைவைப் போலக் கேட்கத் தொடங்குகிறது

*****