விவசாயம் செய்தால் மன அழுத்தம் போய் விடுமா?

விவசாயம் செய்தால் மன அழுத்தம் போய் விடுமா?

பொறியாளர்கள் பலரும் மன அழுத்தம் காரணமாக விவசாயம் நோக்கி வருவதாக வெளியாகும் செய்திகளைப் பார்க்கிறேன்.

மன அழுத்தத்திலிருந்து விடுபட விவசாயம் ஒரு மார்க்கமாக இருக்கிறது என்கிற செய்தியே எனக்கு ஆச்சரியமாக இருக்கிறது.

நான் கிராமத்தில் பார்க்கும் விவசாயிகள் பலரும் விவசாயத்தின் காரணமாகவே மன அழுத்தத்துடன் இருப்பதைப் பார்க்கிறேன்.

அது எப்படி ஒரு துறையினருக்கு மன அழுத்தத்திலிருந்து விடுபட உதவும் மார்க்கமாக இருக்கும் விவசாயம், அதே துறையில் இருக்கும் விவசாயிகளுக்கு மன அழுத்தம் தருவதாக இருக்க முடியும்?

“கடவுள் எனும் தொழிலாளி

கண்டெடுத்த முதலாளி விவசாயி”

என்று விவசாயி திரைப்படத்தில் மருதகாசியின் பாடலை, டி.எம். சௌந்திரராஜன் பின்னணிக் குரல் கொடுக்க எம்.ஜி.ஆர் பாடுவாரே! நிலைமை உண்மையிலேயே அப்படி ஆகி விட்டதா?

அப்படி ஆகியிருந்தால், டில்லியில் ஏன் விவசாயிகள் உயிரைப் பணயம் வைத்துப் போராடுகிறார்கள்?

விவசாயத் தொழிலை விட்டு விட்டு விவசாயிகள் ஏன் கட்டடத் தொழிலாளிகளாக மாறுகின்றனர்?

விவசாயம் செய்யும் கிராமங்களை விட்டு விட்டு, விவசாயப் பெருங்குடி மக்கள் ஏன் நகரங்களுக்கு இடம் பெயர்கிறார்கள்?

ஒரே துறையில் நீண்ட காலம் வேலை பார்ப்பவர்களுக்கு வேறொரு துறையில் ஈடுபடுவது மன அழுத்தத்திலிருந்து விடுபட உதவும் மார்க்கமாக இருக்கலாமே தவிர, விவசாயத்தில் ஈடுபடுவதால் மன அழுத்தம் குறைந்து விடும் என்பதெல்லாம் பக்கா கப்சா.

உங்களுக்கு ஒரு கட்டத்தில், அதற்கு மேல் வருமானம் ஒரு பெரிய பொருட்டில்லை என்றால், உங்கள் மன மகிழ்வுக்காக நீங்கள் விவசாயத்தில் ஈடுபடலாம். அப்படி ஈடுபடுவர்களுக்கு வேண்டுமானால் விவசாயம் மன அழுத்தத்திலிருந்து விடுபடும் மார்க்கமாக இருக்கலாம். மற்றபடி விவசாயம் செய்வதால் மன அழுத்தம் விடுபடுகிறது என்பதெல்லாம், சாமியார்களிடம் போனால் மன அமைதி வந்து விடுகிறது என்று அவிழ்த்து விடப்படும் அக்கப்போர்களே.

உழுதவன் கணக்குப் பார்த்தால் உழக்குக் கூட மிஞ்சாது என்பதுதான் சொலவம்.

உங்களால் கணக்கு வழக்குப் பார்க்காமல் செலவு செய்து விவசாயம் பார்க்க முடியுமானால், உங்களுக்கு விவாசயம் மன அழுத்தத்திலிருந்து விடுபடும் மார்க்கமாக இருக்கலாம். மற்றபடி விவசாயத்தில் ஈடுபட்டு மன அழுத்தத்தைக் குறைக்க பார்க்கிறேன் என்றால் அது, கரும்புச் சாறு பிழியும் கருவியில் தலையைக் கொடுத்துத் தலைவலியைத் தீர்த்துக் கொள்வது போன்றதுதான்.

கல்யாண மண்டபம் கட்டி வைத்தவர்கள், திரையரங்கம் கட்டி வைத்தவர்கள் வேறு வழியில்லாமல் அதை நடத்திக் கொண்டிருப்பதைப் போலத்தான் பெரும்பாலான விவசாயிகளின் நிலையும் நாட்டில் இருக்கிறது. அவர்கள் வேறு வழியில்லாமல் அதைச் செய்து கொண்டிருக்கிறார்கள்.

உங்களுக்கும் வேறு வேலை இல்லை என்றால், நிலங்களை வாங்கிப் போட்டு விட்டு விவசாயம் செய்யலாம்.

உங்களுக்கு எப்படி வசதி என்பதை நீங்களே தீர்மானித்துக் கொள்ளுங்கள்.

இதையும் தாண்டி,

“உழுவார் உலகத்தார்க்கு ஆணி” (குறள், 1032)

“உழுதுண்டு வாழ்வாரே வாழ்வார்” (குறள், 1033)

“உழவுக்கும் தொழிலுக்கும் வந்தனை செய்வோம்” (பாரதியார்)

என்றெல்லாம் புலவர்கள் சொல்லியிருக்கிறார்கள் என்று உழவர்கள் ஆக ஆசைப்பட்டால்,

“துன்பம் உறவரினும் செய்க துணிவாற்றி

இன்பம் பயக்கும் வினை.” (குறள், 669)

“அச்சமில்லை அச்சமில்லை அச்சம் என்பது இல்லையே

உச்சி மீது வான் இடித்து வீழுகின்ற போதினும்

அச்சமில்லை அச்சமில்லை அச்சமென்பதில்லையே” (பாரதியார்)

என்கிற மனத்திட்பமும் வினைத்திட்பமும் உங்களுக்கு வேண்டியிருக்கும் என்பதைக் கவனத்தில் கொள்ளுங்கள். ஏனென்றால், அதைச் சொன்ன புலவர்களே இதையும் சொல்லியிருக்கிறார்கள் என்பதைக் கருத்தில் கொள்ளுங்கள்!

*****