மலரை நினைக்கும் மனதில் அரசியல் வாடை

மலரை நினைக்கும் மனதில் அரசியல் வாடை

பறிக்கப்படாத பூக்களுக்கு

மண்ணை

பூஜிக்கும் பாக்கியம்

 

தெருநாய் காணாமல் போனால்

யாருக்கென்ன கவலை

வீட்டுநாய் காணாமல் போன

வீட்டில் இருப்போருக்கு எல்லாம் கவலை

 

நினைத்தால் போதும்

அதுவே வழிநடத்திச் செல்லும்

நினைக்க வேண்டுமே

பேஸ்புக், டிவிட்டர், இன்ஸ்டாவுக்கு இடையில்

 

அரசியலில் தோல்வி என்பது ஏது

ஆளுநர் ஆகியும் மின்னலாம்

அது சரி

ஆனால் இந்த

சராசரிகளை என்ன பண்ணலாம்

*****

புதிய பறவையின் பாடல்

சேர்ந்து வாழ்வதா

அதெல்லாம் முடியாது

இந்த இணைவு இந்த இரவுக்கானது

நாளை செல்லுபடியாகாது

நாளை நீ

பல இடங்களில் தேடி அலையலாம்

கண்டுபிடிப்பது சாத்தியமற்றது

யாரும் யாரையும் தேடி

ஏன் அலைந்து கொண்டிருக்க வேண்டும்

கிடைப்பவருடன் நேரத்தைப் பகிர்ந்து கொள்ளலாம்

தேடலின் தப்புதலில் இருக்க பிரியப்படுபவர்கள்

இனிவரும் நாட்களில் அதிகமாவார்கள்

உன் சந்தோஷத்திற்காக உன் சிறைகளில் அகப்பட்டு வாழ

எந்தப் பறவை தயாராக இருக்கும்

அடைபட்ட பறவைகளுக்காக தரும் உணவு

விலைமதிப்பற்றதாக இருக்கலாம்

சுதந்திரம் அதை விட விலைமதிப்பற்றதாகி விடுகிறது

நீயும் சுதந்திரமாகக் சுற்றித் திரி

உன்னோடு சுற்றித் திரியப் பிரியப்படும் பறவை

உனக்கு ஒருநாள் கிடைக்கலாம்

யாரையும் அந்தப் பறவையாக எதிர்பார்க்காதே

*****